सुरक्षा निकायमाथि अनुसन्धान गर्न उच्चस्तरीय समिति

काठमाडौं । सरकारले भदौ २३ र २४ गतेको जेनजी आन्दोलनसँग सम्बन्धित घटनामा सुरक्षा निकायका पदाधिकारीहरूको भूमिकामाथि अनुसन्धान गर्न उच्चस्तरीय छानबिन समिति गठन गरेको छ ।

बुधबार बसेको मन्त्रिपरिषद् बैठकले घटनाको वास्तविकता, जिम्मेवारी र परिस्थितिको निष्पक्ष अध्ययन गर्ने उद्देश्यसहित समिति गठन गर्ने निर्णय गरेको हो ।उच्च अदालतका पूर्वन्यायाधीश प्रेमराज कार्कीको संयोजकत्वमा समिति गठन गरिएको छ ।

Advertisement

समितिको सदस्यमा सशस्त्र प्रहरी बलका पूर्वअतिरिक्त महानिरीक्षक सुबोध अधिकारी र नेपाल प्रहरीका पूर्वअतिरिक्त महानिरीक्षक टेकप्रसाद राई रहेका छन् । समितिले सुरक्षा निकायका पदाधिकारीहरूको निर्णय प्रक्रिया, घटनाक्रममा देखिएको भूमिका तथा कार्यान्वयन पक्षको विस्तृत अध्ययन गर्नेछ ।

आवश्यक प्रमाण, कागजात र विवरण संकलन गरी निष्कर्षसहितको प्रतिवेदन तयार गर्नु समितिको मुख्य जिम्मेवारी रहनेछ । समितिलाई सम्बन्धित निकायसँग आवश्यक जानकारी माग गर्ने, घटनासँग जोडिएका व्यक्तिहरूसँग सोधपुछ गर्ने तथा घटनाको सम्पूर्ण पृष्ठभूमि विश्लेषण गर्ने अधिकार दिइएको छ ।

सरकारले समितिको काम निष्पक्ष, स्वतन्त्र र पारदर्शी हुने विश्वास व्यक्त गरेको छ । छानबिन प्रतिवेदनले घटनाका कारण, अवस्था र सम्भावित जिम्मेवारीबारे स्पष्ट निष्कर्ष दिने अपेक्षा गरिएको छ ।

सरकारले यस प्रक्रियाबाट सुरक्षा निकायसँग सम्बन्धित विवाद र प्रश्नहरूको समाधान हुने विश्वास लिएको छ । समितिले तोकिएको समयसीमाभित्र प्रतिवेदन बुझाउनेछ ।