२ हजार ६९२ जनामाथि कारबाही

काठमाडौं । काठमाडौं उपत्यकामा बितेको २४ घण्टामा ट्राफिक प्रहरीले २ हजार ६९२ जना सवारी चालकमाथि कारबाही गरेको छ ।

नियम उल्लंघन गर्ने चालकहरूबाट राज्य कोषमा कुल ७ लाख ६० हजार रुपैयाँ राजस्व संकलन भएको काठमाडौं उपत्यका ट्राफिक प्रहरी कार्यालयले जनाएको छ । कारबाहीमा पर्नेहरूमा ट्राफिक संकेत उल्लंघन गर्ने २२४ जना, तीव्र गतिमा सवारी चलाउने १३२ जना र मादक पदार्थ सेवन गरी सवारी चलाउने ९१ जना रहेका छन् ।

Advertisement

यस्तै, यान्त्रिक अवस्था ठीक नभएका सवारी चलाउने ६३ जना, लेन अनुशासन पालना नगर्ने २३७ जना तथा सार्वजनिक सवारीका ढोका बन्द नगरी चलाउने ४७ जना पनि कारबाहीमा परेका छन् ।

निषेधित क्षेत्रमा हर्न बजाउने ७८ जना र तोकिएको स्थानमा यात्रु चढाउने–ओराल्ने नियम उल्लंघन गर्ने ४० जना चालकलाई समेत कारबाही गरिएको छ । अन्य विभिन्न सवारी नियम उल्लंघन गर्ने १ हजार ७८० जनामाथि समेत ट्राफिक प्रहरीले कारबाही गरेको छ ।