बीपी राजमार्ग खुल्यो

काभ्रेपलाञ्चोक । काभ्रेपलाञ्चोकमा बाढीका कारण तीन दिनदेखि अवरुद्ध बीपी राजमार्ग अस्थायी डाइभर्सन बनाएपछि आज (बिहीबार) बिहानदेखि पुनः सञ्चालनमा आएको छ ।

सोमबारको वर्षासँगै रोशी खोलामा आएको बाढीले सडक बगाएपछि यातायात रोकिएको थियो । चार किलोमिटर क्षेत्रमा बनाइएको अस्थायी डाइभर्सनमा क्षति पुगेपछि प्रहरीको अनुरोधमा आवागमन रोक्ने र खुलाउने क्रम जारी छ ।

Advertisement

राजमार्ग अवरुद्ध भएपछि सवारीसाधनलाई धुलिखेल, काभ्रेभञ्ज्याङ, मङ्गलटार र सिन्धुलीको नेपालथोकमा रोकिएको थियो । गत वर्ष बाढीपहिरोले करिब १८ किलोमिटर सडक बगाएको क्षेत्रमा अहिले पुनर्निर्माणको काम भइरहेको छ ।

प्रहरीले वर्षा भइरहेकाले अत्यावश्यक बाहेक यात्रा नगर्न सर्वसाधारणलाई आग्रह गरेको छ। डाइभर्सन कमजोर भएकाले वर्षा बढ्नेबित्तिकै सडक पुनः अवरुद्ध हुने जोखिम रहेको बताइएको छ । सुरक्षा सतर्कता अपनाउन अधिकारीहरूले सुझाव दिएका छन् ।

स्थानीय प्रशासनका अनुसार रोशी क्षेत्रको सडकमा पानीको बहाव बढ्दा पटकपटक अवरोध हुँदै आएको छ । अहिले पनि प्राविधिक टोलीले निगरानी गर्दै अस्थायी संरचनालाई मजबुत बनाउने काम गरिरहेको छ । यात्रु र चालकलाई सावधानी अपनाउन पनि अनुरोध गरिएको छ ।