प्रधान न्यायाधीश सिफारिसको असर, सर्वोच्चमा पेसी रोकियो

काठमाडौं । प्रधान न्यायाधीशमा चौथो वरीयताका न्यायाधीश डा. मनोजकुमार शर्माको नाम सिफारिस भएपछि त्यसको प्रभाव सर्वोच्च अदालतको दैनिक कामकारबाहीमै देखिएको छ । शुक्रबार बिहानदेखि सर्वोच्च अदालतमा पेसी व्यवस्थापन प्रभावित बनेको हो ।

सामान्यतया बिहान साढे ९ बजेदेखि पौने १० बजाभित्र सार्वजनिक हुने दैनिक पेसी सूची ११ः१५ बज्दासम्म पनि सर्वोच्च अदालतको वेबसाइटमा राखिएको थिएन । स्रोतका अनुसार न्यायाधीशहरूबीच गोला तान्ने प्रक्रिया समेत अघि बढ्न सकेको छैन ।

Advertisement

प्रधान न्यायाधीश सिफारिसको विषयलाई लिएर न्यायाधीशहरू र सर्वोच्च प्रशासनका उच्च अधिकारीबीच आन्तरिक छलफल जारी रहेको बताइएको छ । पेसी व्यवस्थापनमा खटिएका कर्मचारीहरूका अनुसार बिहानदेखि बैठक चलिरहेकाले सूची प्रकाशन रोकिएको हो ।

यसबीच मुद्दाका पक्षकार, कानुन व्यवसायी तथा सेवाग्राहीहरू भने पेसी सूचीको प्रतीक्षामा अदालत परिसरमै अलमलमा परेका छन् । प्रधान न्यायाधीश सिफारिसपछि विकसित पछिल्लो परिस्थितिले न्यायालयभित्र असन्तुष्टि र अन्योल बढेको संकेत गरेको छ ।

संवैधानिक परिषद्को सिफारिसमा न्यायाधीश शर्माको नाम प्रधान न्यायाधीशका लागि अघि बढाइएको थियो । उनको सिफारिसले वरीयता र स्थापित परम्परा मिचिएको भन्दै न्यायिक वृत्तमै त्यसको चर्चा एवं विरोध भइरहेको छ ।