खारेजीमा परेका कर्मचारी संगठनद्वारा आईएलओमा उजुरी

काठमाडौं। खारेजीमा परेका निजामती कर्मचारी संगठनहरूले अन्तर्राष्ट्रिय श्रम संगठन (आईएलओ) गुहारेका छन्। आफ्नो खारेजी असंवैधानिक र अन्तर्राष्ट्रिय अभिसन्धी विपरीत भएको भन्दै उनीहरूले स्विजरल्यान्डको जेनेभास्थित आईएलओको मुख्य कार्यालयमा उजुरी दर्ता गराएका हुन् ।

नेपालमा क्रियाशील सम्पूर्ण ट्रेड युनियन संगठनहरूको सहभागितामा उजुरी दिइएको विघटित नेपाल निजामती कर्मचारी संगठनकी अध्यक्ष भवानी दाहालले जानकारी दिइन् ।

Advertisement

सरकारले गत साता केही अध्यादेश जारी गर्दै सरकारी निकायमा ट्रेड युनियनसम्बन्धी गतिविधि गर्न पूर्ण रूपमा बन्देज लगाएको थियो। नेपाल आईएलओको अभिसन्धीको पक्ष राष्ट्र भएको अवस्थामा कानुन ल्याएर यस्ता गतिविधि रोक्न नमिल्ने कर्मचारीहरूको जिकिर छ ।

उजुरीपछि आईएलओको नेपाल कार्यालयले सबै संगठनका प्रतिनिधिलाई बोलाएर छलफल गरिसकेको छ । यस विषयमा आईएलओले सरकारलाई समेत पत्राचार गरिसकेको जानकारी दाहालले दिइन् ।