खड्काको असन्तुष्टि : पार्टी एकतामा ठेस पुगेको निष्कर्ष

काठमाडौं। नेपाली कांग्रेसका निवर्तमान कार्यवाहक सभापति पूर्णबहादुर खड्काले पार्टीको केन्द्रीय कार्यसमितिमा गरिएको पछिल्लो मनोनयनप्रति कडा असन्तुष्टि जनाएका छन्। विशेष महाधिवेशनबाट गठित कार्यसमितिको विस्तारका क्रममा वैशाख २८ गते गरिएको निर्णयले पार्टीको बृहत्तर र सम्पूर्ण एकता गर्ने उद्देश्यमा ठेस पुर्‍याएको उनले बताए।

सामाजिक सञ्जालमार्फत आफ्नो धारणा सार्वजनिक गर्दै खड्काले मनोनयनको विषयमा आफूसँग कुनै छलफल वा परामर्श नभएको र यसबारे आफूलाई जानकारी समेत नरहेको स्पष्ट पारे। मुलुकको राष्ट्रियता इतिहासकै जोखिमपूर्ण अवस्थामा रहेको र लोकतन्त्रका आधार स्तम्भमाथि निरन्तर आक्रमण भइरहेको बेला पार्टी विभाजित हुनु घातक हुने उनले उल्लेख गरे।

Advertisement

केही समयअघि सभापति गगन थापा र उपसभापति विश्वप्रकाश शर्मासँगको सामूहिक भेटमा आफूले पार्टीलाई पूर्ण रूपमा एक बनाउने अभियानमा लाग्न अनुरोध गरेको खड्काले स्मरण गरे। पार्टीको बृहत् र सम्पूर्ण एकता नभई राष्ट्रिय राजनीतिमा प्रभावकारी र सार्थक भूमिका खेल्न सम्भव नहुने उनको ठम्याइ छ।

उनले २८ गतेको निर्णयले एकताको उद्देश्यमा अवरोध सिर्जना गरेको बताउँदै पार्टीलाई एकताबद्ध बनाउने मुख्य जिम्मेवारी गगन थापा र दोस्रोमा विश्वप्रकाश शर्माको रहेको उल्लेख गरे। विगतमा पार्टी विभाजन हुँदा नागरिकको भरोसा गुमेको र ठुलो क्षति बेहोर्नु परेको घटनाबाट पाठ सिक्दै शीर्ष नेताहरूलाई आत्मसमीक्षा गर्न उनले आग्रह गरे।

गत फागुन २१ गते सम्पन्न आम निर्वाचनको परिणामले कांग्रेसलाई ठुलो क्षति पुर्‍याएको भन्दै उनले नयाँ सोच र साझा भावधारासहित अगाडि बढ्न प्रेरणा लिनुपर्ने बताए। अहिलेको समयमा व्यक्तिगत र गुटगत स्वार्थभन्दा माथि उठेर भावनात्मक एकता कायम गर्नुको विकल्प नरहेको खड्काले स्पष्ट पारे। निर्णायक भूमिकामा रहेका नेताहरूले अझै पनि सामूहिक भावना र साझा विचारका साथ पार्टीलाई एकताबद्ध बनाउने दिशामा अग्रसर हुने विश्वास उनले व्यक्त गरे।