प्रधानमन्त्रीको स्वास्थ्यमा कांग्रेसको प्रश्न : ‘तत्काल परीक्षण गरी जानकारी देऊ’

काठमाडौं । प्रमुख प्रतिपक्षी दल नेपाली कांग्रेसले प्रधानमन्त्री बालेन शाहको स्वास्थ्य अवस्थाबारे प्रश्न उठाउँदै तत्काल स्वास्थ्य परीक्षण गर्न माग गरेको छ। प्रतिनिधि सभाको मंगलबारको बैठकमा बोल्दै कांग्रेस संसदीय दलका नेता भीष्मराज आङ्देम्बेले आफ्नै सरकारको नीति तथा कार्यक्रम संसदमा पेस भइरहँदा प्रधानमन्त्री बीचैमा उठेर बाहिरिएको भन्दै यस्तो माग गरेका हुन्।

संसद्‌मा बोल्दै नेता आङ्देम्बेले आफ्नै सरकारको नीति कार्यक्रम पेस भइरहँदा प्रधानमन्त्री बीचैमा उठेर हिँड्नु स्वाभाविक नभएको बताए। यदि अचानक स्वास्थ्य स्थिति गम्भीर बनेका कारण उनी हिँडेका हुन् भने सरकारले अविलम्ब स्वास्थ्य परीक्षण गरेर यसबारे संसदलाई जानकारी गराउनुपर्ने उनले उल्लेख गरे।

Advertisement

आङ्देम्बेले प्रधानमन्त्रीको यो व्यवहारलाई ‘अमर्यादित र अहंकारपूर्ण’ भन्दै यसले सदनको गरिमा र इज्जतमा दाग लागेको टिप्पणी गरे। कुनै पनि देशको प्रधानमन्त्रीले यस्तो गैर-जिम्मेवार व्यवहार नदेखाउने बताउँदै उनले यस विषयमा सरकारको आधिकारिक धारणा माग गरे।