५८ सांसदले बुझाए सम्पत्ति विवरण, जेठ १० भित्र बुझाउनुपर्ने

काठमाडौं । सङ्घीय संसद्का ५८ जना सांसदले आफ्नो सम्पत्ति विवरण बुझाएका छन् । सङ्घीय संसद् सचिवालयको सांसद सुविधा शाखामा उनीहरूले आफ्नो र परिवारको नाममा रहेको सम्पत्तिको विवरण पेस गरेका हुन् ।

भ्रष्टाचार निवारण ऐन २०५९ र अख्तियार दुरुपयोग अनुसन्धान आयोग ऐन २०४८ अनुसार सार्वजनिक पद धारण गरेको व्यक्तिले ६० दिनभित्र सम्पत्ति विवरण बुझाउनुपर्ने कानुनी व्यवस्था छ । सोही व्यवस्था अनुसार संसद् सचिवालयले सूचना जारी गर्दै सांसदहरूलाई सम्पत्ति विवरण बुझाउन आग्रह गरेको थियो ।

Advertisement

सचिवालयका अनुसार प्रतिनिधिसभाका सदस्यहरूले आगामी जेठ १० गतेसम्ममा आफ्नो सम्पत्ति विवरण बुझाउनुपर्ने समयसीमा तोकिएको छ । हाल सङ्घीय संसद् अन्तर्गत २७५ सदस्यीय प्रतिनिधिसभा र ५९ सदस्यीय राष्ट्रिय सभा रहेका छन् । तोकिएको समयभित्र विवरण नबुझाउने सार्वजनिक पदधारी व्यक्तिलाई कानुनी कारबाहीको व्यवस्था समेत रहेको छ ।