ठगी र विश्वासघातको आरोपमा सीईओ पक्राउ

काठमाडौं । नेपाल इन्भेस्टमेन्ट मेगा बैंक लिमिटेडका प्रमुख कार्यकारी अधिकृत (सीईओ) ज्योतिप्रकाश पाण्डे ठगी तथा आपराधिक विश्वासघातको आरोपमा पक्राउ परेका छन् ।

नेपाल प्रहरीको केन्द्रीय अनुसन्धान ब्यूरो (सीआईबी)को अनुरोधमा जिल्ला प्रहरी कार्यालय सिन्धुलीले उनलाई मंगलबार राति करिब ८ बजेतिर नियन्त्रणमा लिएको हो । प्रहरीका अनुसार पाण्डेलाई मोबाइल फोन बन्द गरी सम्पर्कविहीन हुँदै भागिरहेका अवस्थामा मदन भण्डारी राजमार्गअन्तर्गत कमलामाई नगरपालिका–६ स्थित बसपार्कबाट सवारी चेकजाँचका क्रममा पक्राउ गरिएको प्रहरीले जनाएको छ ।

Advertisement

प्रारम्भिक अनुसन्धानबाट स्मार्ट टेलिकमको सम्पत्ति व्यवस्थापन प्रक्रियामा उनले अनियमितता गरेको देखिएको छ । अनुमति नवीकरण नभएपछि २०८० वैशाख ३ गतेदेखि स्वतः खारेज भएको स्मार्ट टेलिकमको सम्पत्ति, पूर्वाधार र सञ्जाल राज्यको नियन्त्रणमा रहने भए पनि त्यसलाई लिलामी प्रक्रियामा गलत तरिकाले प्रयोग गरिएको आरोप छ ।

उनी लोन रिकभरी कमिटीका अध्यक्षसमेत रहेकाले निर्णय प्रक्रियामा बदनियतपूर्ण भूमिका खेलेको आशंका गरिएको छ । प्रहरीका अनुसार सरकारको अधिकार कमजोर पार्ने उद्देश्यले सम्पत्ति व्यवस्थापनमा अनियमितता गरिएको र लिलामी प्रक्रियामा गलत निर्णयहरू गरिएको देखिएको छ ।

त्यसैगरी नेपाल इन्भेस्टमेन्ट मेगा बैंकले २०८२ असोज ३ गते प्रकाशित लिलामी सूचनासम्बन्धी विषयमा करिब ४० करोड रुपैयाँ बराबरको रकम अपचलन भएको आरोप पनि छ । लिलामीका क्रममा बोलपत्रदाताबाट घरबहाल र विद्युत् महसुलबापत अतिरिक्त रकम संकलन गरिएको भए पनि उक्त रकम सम्बन्धित घरधनीलाई नदिई बैंकमै राखिएको प्रारम्भिक अनुसन्धानमा देखिएको छ ।

सीआईबीका प्रवक्ता एसएसपी शिवकुमार श्रेष्ठका अनुसार पाण्डेमाथि मुलुकी अपराध संहिता, २०७४ अनुसार ठगी तथा आपराधिक विश्वासघातसम्बन्धी मुद्दामा थप अनुसन्धान अघि बढाइने छ । प्रहरीले घटनालाई गम्भीर आर्थिक अपराधका रूपमा लिएर विस्तृत अनुसन्धान गरिरहेको छ ।