प्रधानमन्त्रीलाई सदनमा उपस्थित गराउन रुलिङ गर्ने अधिकार आफूसँग छैन : सभामुख अर्याल

काठमाडौं। प्रतिनिधि सभाका सभामुख डोलप्रसाद अर्यालले आफूलाई प्रधानमन्त्री बालेन्द्र साहलाई संसद्को बैठकमा उपस्थितिका लागि मिति तोक्ने कुनै अधिकार नभएको बताएका छन्। विपक्षी दलका सांसदहरूले सरकारको नीति तथा कार्यक्रममाथिको छलफलमा प्रधानमन्त्रीलाई अनिवार्य उपस्थित गराउन रुलिङको माग गरेपछि उनले यस्तो प्रष्ट पारेका हुन्।

सभामुख अर्यालले कुनै पनि सांसदलाई सभामा उपस्थितिका लागि कार्यतालिका तोक्ने अधिकार र कानुनी आधार आफूसँग नभएको स्पष्ट पारे। संसद्मा बोल्दै सभामुख अर्यालले कानुन निर्माणको थलो भएकाले स्थापित नियम र कानुनमा टेकेर नै सदन सञ्चालन गर्नुपर्नेमा जोड दिए।

Advertisement

सांसदहरूले प्रधानमन्त्री आउने सुनिश्चितता खोजेको विषयमा टिप्पणी गर्दै उनले भविष्यको कार्यतालिका निर्धारण गर्न सभामुख असमर्थ रहेको बताए। ‘हामी कानुन निर्माणको थलोमा छौँ र त्यही कानुनमा टेकेर सभा सञ्चालन गरिरहेका छौँ,’ उनले भने, ‘भोलि कोही पनि माननीय सदस्य वा प्रधानमन्त्री सदनमा आउन सक्नु हुन्छ वा सक्नु हुन्न भनेर आजै सभामुखले कार्यतालिका सोध्न सक्ने कुनै अधिकार र आधार मैले देख्दिनँ।’

सभामुख अर्यालले बैठक सुचारु गराउन विपक्षी दलका सांसदहरूलाई आग्रह गर्दै प्रधानमन्त्री साहसँग आजै बेलुका उपस्थितिका विषयमा आफूले छलफल गर्ने प्रतिबद्धता समेत व्यक्त गरे। विपक्षीको अवरोध र सभामुखको प्रष्टीकरणपछि प्रतिनिधि सभाको बैठक पुनः १५ मिनेटका लागि स्थगित भएको छ।