सांसद खरेलको अभिव्यक्तिप्रति पत्रकार महासङ्घको आपत्ति

काठमाडौं। सत्ताधारी दल राष्ट्रिय स्वतन्त्र पार्टीका सांसद जगदीश खरेलले एक पत्रिका बन्द गर्ने धम्की दिएको भन्दै नेपाल पत्रकार महासङ्घले गम्भीर आपत्ति जनाएको छ।

समाचारको विषयलाई लिएर विधायकले प्रहरीको साइबर ब्युरोमा उजुरी गर्नु र सञ्चार माध्यमलाई नै बन्द गराउने धम्की दिनु आपत्तिजनक रहेको महासङ्घले बुधबार जारी गरेको विज्ञप्तिमा उल्लेख छ।

महासङ्घले प्रकाशित समाचार सामग्रीप्रति कुनै असहमति वा गुनासो भए प्रेस काउन्सिल नेपालमार्फत कानुनी उपचार र समाधान खोज्न आग्रह गरेको छ।

प्रेस स्वतन्त्रताको सम्मान गर्न आग्रह गर्दै महासङ्घले आगामी दिनमा यस्ता स्वतन्त्रता विरोधी हर्कत नदोहोर्‍याउन समेत सांसद खरेल र सम्बन्धित पक्षको ध्यानाकर्षण गराएको छ।