निर्माणाधीन खानेपानी ट्यांकीबाट खसेर एक मजदुरको मृत्यु

झापा । झापाको मेचीनगर नगरपालिका–५ शान्ति टोलमा निर्माणाधीन खानेपानी ट्यांकीबाट खसेर एक जना मजदुरको मृत्यु भएको छ । मृत्यु हुनेमा सोही ठाउँका ५२ वर्षीय दिननाथ पराजुली रहेको झापा प्रहरीले जनाएको छ ।

प्रहरीका अनुसार शनिबार दिउँसो १२ः३० बजेतिर निर्माणाधीन ट्यांकीको सेटरिङका लागि प्रयोग गरिएको बाँस खोल्ने क्रममा पराजुली अचानक ३ तला माथिबाट भुइँमा खसेका थिए । उचाइबाट खसेर गम्भीर घाइते भएका उनलाई तत्काल उपचारका लागि बिर्तामोडस्थित बि एन्ड सी अस्पताल पुर्‍याइएको थियो ।

Advertisement

अस्पताल पुर्‍याउनासाथ चिकित्सकले उनलाई मृत घोषणा गरेको प्रहरीले जनाएको छ । घटनाको जानकारी पाउनासाथ इलाका प्रहरी कार्यालय अनारमनीको टोली पुगेर प्रारम्भिक अनुसन्धान तथा कानुनी प्रक्रिया पूरा गरेको छ ।

मृतकको शव पोस्टमार्टमका लागि भद्रपुरस्थित प्रादेशिक मेची अस्पताल पठाइएको छ । घटनाको सम्बन्धमा थप अनुसन्धान अगाडि बढाइएको प्रहरीले जनाएको छ ।