झापामा घाइते अवस्थामा भेटिएको जंगली साँढे गोरुको मृत्यु

मुलुकी खबर

२०८३ जेष्ठ ६, बुधबार १४:५०

झापा । झापाको मेचीनगर नगरपालिका–६ भट्टराईचोकमा घाइते अवस्थामा फेला परेको जंगली साँढे गोरुको मृत्यु भएके छ ।

गौर प्रजातिको जंगली गोरु बुधबार बिहान ७ः३० बजेतिर नेहा बेकरी अगाडि सडक छेउमा घाइते भएर सुतेको अवस्थामा फेला परेको थियो । घाइते अवस्थामा साँढे गौरलाई स्थानीयले देखेपछि प्रहरीलाई खबर गरेका थिए ।

सूचना प्राप्त भएपछि प्रहरी र वन कार्यालयको टोली घटनास्थल पुगेको थियो । उपचार तथा उद्धारको तयारी भइरहेका बेला बिहान करिब ८ः३० बजे उक्त गोरुको मृत्यु भएको झापा प्रहरीका सूचना अधिकारी डीएसपी खगेन्द्रबहादुर खड्काले बताए ।

उनका अनुसार मृत जंगली साँढे गोरुलाई आवश्यक प्रक्रिया पूरा गरी डिभिजन वन कार्यालय धाईजनको टोलीले सतगतका लागि लिएर गएको छ । घटनाको थप अनुसन्धान भइरहेको प्रहरीले जनाएको छ ।

बाहिरी चोटपटक नदेखिएका कारण गौर कसरी घाइते भयो भन्ने यकिन हुन नसकेको डीएसपी खड्काको भनाइ छ । गौर नेपालमा पाइने संरक्षित वन्यजन्तुमध्येमा पर्छ ।

नेपालमा गौर मुख्यतः तराई र चुरे क्षेत्रका जंगलमा पाइन्छ । विशेष गरी चितवन राष्ट्रिय निकुञ्ज, पर्सा राष्ट्रिय निकुञ्ज लगायतका क्षेत्रमा देखिने गरेको छ। भारत, भुटान, थाइल्यान्ड लगायत दक्षिण तथा दक्षिण–पूर्वी एशियाका जंगलमा पनि यो पाइन्छ ।

वन विज्ञहरुका अनुसार गौर सामान्यतया मानिसमाथि आक्रमण गर्ने जनावर होइन । तर, डराएमा, घाइते भएमा वा बच्चा जोगाउने अवस्थामा निकै आक्रामक बन्न सक्छ। त्यसैले जंगल वा बस्ती नजिक देखिएमा वन कार्यालय वा वन्यजन्तु प्राविधिकलाई खबर गर्नुपर्ने विज्ञहरु बताउँछन् । उनीहरुका अनुसार वन विनाश, मानव अतिक्रमण र चोरी सिकारीका कारण यसको संख्या घट्दै गएको छ ।