बुद्ध एयरको दुर्घटनाग्रस्त जहाज १० दिनभित्र हटाइने 

झापा । झापाको चन्द्रगढी विमानस्थलको धावनमार्ग नजिकै रहेको बुद्ध एयरको दुर्घटनाग्रस्त जहाजको अवशेष आगामी १० दिनभित्र हटाइने भएको छ । चार महिनाअघि अवतरणका क्रममा दुर्घटनामा परेको ‘कल साइन ९०१’ जहाजलाई व्यवस्थापन गर्न लागिएको हो ।

गत पुस १८ गते राति काठमाडौंबाट आएको बुद्ध एयरको उक्त जहाज धावनमार्गको पश्चिमी किनारबाट चिप्लिएर खोल्सीमा खसेको थियो । ५१ जना सवार उक्त जहाज दुर्घटनामा चालक दलका सदस्यसहित सात जना घाइते भएका थिए ।

Advertisement

दुर्घटनापछि जहाजको अवशेषलाई त्रिपालले छोपेर घटनास्थलमै राखिएको थियो । धावनमार्गको छेउमै दुर्घटनाग्रस्त जहाज देखिँदा उडान भर्ने यात्रुहरूमा मनोवैज्ञानिक त्रास र असहजता बढ्ने गरेको भन्दै लामो समयदेखि गुनासो आउने गरेको थियो ।

चन्द्रगढी विमानस्थल कार्यालयका प्रमुख किशोरकुमार खत्रीका अनुसार प्राविधिक अनुसन्धान र बिमा कम्पनीको मूल्यांकन प्रक्रियाका कारण जहाजको अवशेष हटाउन समय लागेको हो । ‘दुर्घटना जाँचबुझ समिति र बिमा कम्पनीले आवश्यक सबै प्रक्रिया पूरा गरिसकेका छन्,’ प्रमुख खत्रीले भने, ‘त्यसैले अबको १० दिनभित्र जहाजको सबै अवशेष पूर्ण रूपमा व्यवस्थापन गरिने छ ।’

जहाज हटाउने स्वीकृत प्रक्रियाअनुसार हाल दुर्घटनाग्रस्त विमानको बडीबाट ‘बुद्ध एयर’को नाम, लोगो तथा अन्य पहिचान खुल्ने चिह्नहरू मेटाउने कार्य सम्पन्न भइसकेको छ । अहिले विमानको ढाँचा मात्र देखिए पनि कम्पनीको पहिचान खुल्ने कुनै चिह्न बाँकी नरहेको विमानस्थल प्रशासनले जनाएको छ ।

बिमा कम्पनी आफैँले आगामी १० दिनभित्र उक्त अवशेष पूर्ण रूपमा हटाउने जिम्मा लिएको छ । यो कार्य सम्पन्न भएसँगै विमानस्थलमा यात्रुहरूले महसुस गर्ने मनोवैज्ञानिक डर अन्त्य हुने र विमानस्थल थप व्यवस्थित देखिने अपेक्षा गरिएको छ ।