
विराटनगर । बढ्दो लागुऔषध दुर्व्यसनलाई नियन्त्रण गर्न र युवापुस्तामा जनचेतना फैलाउन जिल्ला प्रहरी कार्यालय मोरङले नौलो पहल सुरु गरेको छ । ‘लागुऔषधविरुद्धको महाअभियान, २०८३’ अन्तर्गत प्रहरीले टिकटक भिडियो प्रतियोगिता आयोजना गर्ने घोषणा गरेको हो ।
मोरङ प्रहरी प्रमुख, प्रहरी उपरीक्षक (एसपी) कवित कटवालले आइतबार अभियानकाे उद्घाटनका क्रममा प्रतियोगिताको बारेमा जानकारी दिए । सामाजिक सञ्जालको बढ्दो प्रयोगलाई मध्यनजर गर्दै युवाहरूलाई लागुऔषधविरुद्धको अभियानमा सक्रिय बनाउन यो प्रतियोगिता प्रभावकारी हुने उनले बताए ।
के छ प्रतियोगिताको नियम ?
प्रतियोगितामा सहभागी हुन चाहने टिकटक प्रयोगकर्ताले ‘बढ्दो लागुऔषध विरुद्ध एकजुट हौँ’ भन्ने मूल सन्देशमा आधारित रहेर जनचेतनामूलक भिडियो तयार गर्नुपर्नेछ । प्रतियोगिता जेठ १० गतेबाट खुल्ला गरिएको छ र इच्छुक सहभागीले जेठ मसान्तसम्म भिडियो बनाएर प्रतिस्पर्धामा भाग लिन सक्नेछन् । प्रतियोगितामा प्रथम पुरस्कार ५० हजार रुपैयाँ, दोस्रो पुरस्कार ४० हजार रुपैयाँ, तेस्रो पुरस्कार ३० हजार रुपैयाँ, चौथो पुरस्कार २० हजार रुपैयाँ र पाँचौँ पुरस्कार १० हजार रुपैयाँ राखेकाे छ ।
अभियानलाई थप प्रभावकारी बनाउन र युवापुस्तामा सकारात्मक सन्देश प्रवाह गर्ने उद्देश्यले यो प्रतियोगिता सबैका लागि खुल्ला गरिएको उनले बताए ।प्रतियोगितामा सहभागी हुन इच्छुक व्यक्तिहरूले आफूले तयार पारेको भिडियो जिल्ला प्रहरी कार्यालय मोरङको आधिकारिक सम्पर्क माध्यम वा प्रहरीले तोकेको प्लेटफर्ममा पठाउनुपर्नेछ ।
























