‘प्रधानमन्त्रीको अभिव्यक्तिले राष्ट्रिय अडान कमजोर बनायो’

काठमाडौं । नेपाल बार एसोसिएसनले नेपाल–भारत सीमा विवादबारे प्रधानमन्त्री बालेन्द्र (बालेन) शाहले संसदमा दिएको अभिव्यक्तिप्रति गम्भीर आपत्ति जनाएको छ । बारले प्रधानमन्त्रीको भनाइलाई गैरजिम्मेवार, अपरिपक्व र राष्ट्रिय स्वाभिमानमाथि आघात पुग्ने खालको टिप्पणीको संज्ञा दिएको हो ।

प्रधानमन्त्रीको अभिव्यक्तिले राष्ट्रिय अडानलाई कमजोर बनाएको बारको निष्कर्ष छ । बारका महासचिव एवं वरिष्ठ अधिवक्ता केदारप्रसाद कोइरालाद्वारा जारी विज्ञप्तिमा नेपालको सीमा र भू–अखण्डतासँग जोडिएका विषय अत्यन्त संवेदनशील भएकाले सार्वजनिक अभिव्यक्तिमा उच्च जिम्मेवारी आवश्यक पर्ने उल्लेख गरिएको छ । विज्ञप्तिमा प्रधानमन्त्रीको पछिल्लो अभिव्यक्तिले नेपालले लामो समयदेखि अन्तर्राष्ट्रिय स्तरमा उठाउँदै आएको सीमा सम्बन्धी स्थापित अडानलाई कमजोर बनाउने जोखिम सिर्जना गरेको दाबी गरिएको छ ।

Advertisement

बारले नेपालको एक इञ्च भूमि पनि कसैलाई छोड्न नसकिने स्पष्ट पार्दै सीमा विवाद भावनात्मक अभिव्यक्ति वा राजनीतिक आवेगका आधारमा समाधान हुने विषय नभएको बताएको छ । यस्ता विषय ऐतिहासिक तथ्य, आधिकारिक नक्सा, सन्धि–सम्झौता तथा प्राविधिक प्रमाणका आधारमा मात्रै टुंग्याउनुपर्ने बारको धारणा छ । विज्ञप्तिमा नेपाल र भारत दुवै देशका प्राविधिक टोली तथा कूटनीतिक संयन्त्रमार्फत समाधान खोजिनुपर्नेमा जोड दिइएको छ ।

त्यस्तै, खेतीपाती, नदीको बहाव परिवर्तन वा स्थानीय प्रयोगका कारण उत्पन्न हुने ‘क्रस होल्डिङ’ जस्ता प्राविधिक अवस्थालाई योजनाबद्ध सीमा अतिक्रमणसँग तुलना गर्नु उपयुक्त नहुने बारको भनाइ छ । प्रधानमन्त्रीको अभिव्यक्तिले यिनै दुई फरक विषयलाई एउटै रूपमा प्रस्तुत गरेको भन्दै बारले कूटनीतिक समझदारी र संवेदनशीलतामाथि समेत प्रश्न उठाएको छ ।

विज्ञप्तिमा आगामी दिनमा सरकारले राष्ट्रिय हित, सीमा सुरक्षा र भौगोलिक अखण्डताजस्ता विषयमा थप स्पष्ट, संयमित र जिम्मेवार ढुंगले सार्वजनिक धारणा राख्नुपर्ने आवश्यकता औँल्याइएको छ ।