झापामा चर्को गर्मीबीच सडकमै बेहोस भेटिएकी महिलाको मृत्यु

झापा । झापामा अत्यधिक गर्मी बढिरहेका बेला हल्दिबारी गाउँपालिकामा एक महिलाको सडकमै मृत्यु भएको छ ।

गर्मीका कारण स्वास्थ्यमा समस्या उत्पन्न भएर घटना भएको आशंका गरिएको छ । प्रहरीले मृत्युको वास्तविक कारण पत्ता लगाउन अनुसन्धान अघि बढाएको छ ।

Advertisement

हल्दिबारी गाउँपालिका–२ पशुपति चोकपूर्व बस्ने लुखी हेमराम सडकमा लडिरहेको अवस्थामा मंगलबार फेला परेकी थिइन् । स्थानीयले देखेपछि प्रहरीलाई खबर गरेका थिए । घटनास्थल पुग्दा उनको मृत्यु भइसकेको प्रहरीले जनाएको छ ।

चर्को घाम र अत्यधिक गर्मीका बीच पैदल हिँडिरहेका बेला उनी अचानक सडकमा ढलेको स्थानीयले बताएका छन् । यद्यपि, मृत्युको वास्तविक कारण भने पोस्टमार्टमपछि यकिन प्रहरीले जनाएको छ ।

झापा प्रहरीका निमित्त सूचना अधिकारी सुमन बानियाका अनुसार घटनाको विस्तृत अनुसन्धान अघि बढाइएको छ । शव परीक्षणका लागि आवश्यक प्रक्रिया पूरा गरेर मृत्युको यथार्थ कारण सार्वजनिक गरिने उनले बताए ।

पछिल्ला केही दिनयता झापासहित तराईका जिल्लाहरूमा तापक्रम निरन्तर बढिरहेको छ । अत्यधिक गर्मीका कारण दैनिक जनजीवन प्रभावित बन्दै गएको छ । स्वास्थ्यकर्मीहरूले यस्तो मौसममा प्रशस्त पानी पिउन, अनावश्यक रूपमा घाममा लामो समय नहिँड्न तथा वृद्धवृद्धा, बालबालिका र कमजोर स्वास्थ्य भएका व्यक्तिलाई विशेष सावधानी अपनाउन आग्रह गरेका छन् ।