स्वास्थ्यकर्मीलाई संक्रमण रोकथाम तथा नियन्त्रण सम्बन्धी तालिम

विराटनगर । विराटनगरस्थित नोबेल मेडिकल कलेजले आफ्ना स्वास्थ्यकर्मीहरूका लागि संक्रमण रोकथाम तथा नियन्त्रण सम्बन्धी विशेष प्रशिक्षण कार्यक्रम आयोजना गरेको छ । अस्पतालमा हुनसक्ने संक्रमणको जोखिम न्यूनीकरण गर्ने उद्देश्यले स्वास्थ्यकर्मीहरूलाई एक दिने प्रशिक्षण दिइएको हो ।

अस्पतालकी संक्रमण रोकथाम तथा नियन्त्रण टोलीकी इन्चार्ज निशा पौडेलले नर्सिङ स्टाफहरूलाई आधारभूत सिद्धान्त, व्यक्तिगत सुरक्षा, उपकरण व्यवस्थापन र जोखिम न्यूनीकरणका विषयमा प्रशिक्षण दिएकी थिइन् । प्रशिक्षणका क्रममा फोहर मैला व्यवस्थापनका साथै स्वास्थ्यकर्मीहरूलाई सैद्धान्तिक ज्ञानसँगै व्यवहारिक अभ्यास समेत गराइएको थियो ।

Advertisement

इन्चार्ज पौडेलका अनुसार सहभागीहरूलाई हातको सही सरसफाइ गर्ने तरिका, फोहर मैलाको सुरक्षित विसर्जन, सिभिसि ड्रेसिङ र स्वास्थ्य उपकरणहरूको सुरक्षित व्यवस्थापनबारे प्रयोगात्मक अभ्यास गराइएको थियो ।
कार्यक्रममा अस्पतालकी नर्सिङ मेट्रोन श्रीजु पराजुलीले स्वास्थ्यकर्मीहरूको ज्ञान र सीप अभिवृद्धि गर्न यो तालिम निकै फलदायी हुने विश्वास व्यक्त गरिन् । ‘स्वास्थ्यकर्मीहरूलाई सुरक्षित र सहज वातावरणमा काम गर्न सहयोग पुर्‍याउने उद्देश्यले तालिम आयोजना गरिएको हो,’ मेट्रोन पराजुलीले भनिन् । उनले आगामी दिनहरूमा पनि अस्पतालका विभिन्न विभागमा कार्यरत स्वास्थ्यकर्मीहरूलाई लक्षित गरी यस्ता सीपमूलक र सचेतनात्मक कार्यक्रमहरू सञ्चालन गरिने बताइन् ।

अस्पताल प्रशासनका अनुसार प्रशिक्षणमा विभिन्न वार्डका इन्चार्जहरू, नयाँ नर्सिङ स्टाफसहित करिब १ सय बढी स्वास्थ्यकर्मीहरूको सहभागिता रहेको थियो । यस किसिमको तालिमले अस्पतालको सेवालाई थप सुरक्षित र गुणस्तरीय बनाउन मद्दत पुग्ने कलेजले जनाएको छ ।