सम्पत्ति विवरण असार मसान्तसम्म बुझाउन सकिने

काठमाडौं । सम्पत्ति छानबिन आयोगले सम्पत्ति विवरण पेस गर्ने समयावधि असार मसान्तसम्मका लागि थप गरेको छ ।

आयोगले यसअघि जेठ मसान्तभित्र सम्पत्ति विवरण बुझाउन निर्देशन दिएको भए पनि विभिन्न कारण देखाउँदै समय थपिएको हो । आयोगका अध्यक्ष राजेन्द्र भण्डारीका अनुसार सम्पत्ति विवरण बुझाउनुपर्ने कतिपय व्यक्ति विदेशमा रहेका तथा आवश्यक विवरण संकलन गर्न समय लागेको भन्दै म्याद थप गर्न अनुरोध गरेपछि असार मसान्तसम्मको अतिरिक्त समय प्रदान गरिएको हो ।

Advertisement

आयोगले जेठ १ गते सार्वजनिक सूचना जारी गर्दै पूर्वप्रधानमन्त्रीदेखि सहसचिव तहसम्मका पदाधिकारीलाई सम्पत्ति विवरण बुझाउन आग्रह गरेको थियो । सो सूचनाअनुसार जेठ मसान्तसम्म विवरण बुझाइसक्नुपर्ने व्यवस्था थियो ।

तर, निर्धारित समय सकिन तीन दिन बाँकी रहँदा करिब तीन हजार पाँच सय जनाले मात्रै सम्पत्ति विवरण पेस गरेको आयोगले जनाएको छ । आयोगका प्रवक्ता गणेश केसीका अनुसार विवरण बुझाउनेहरूको बढ्दो चाप र प्रक्रियालाई सहज बनाउन अन्तिम पटकका लागि म्याद थपिएको हो । उनले हालसम्म प्राप्त सम्पत्ति विवरणको प्रारम्भिक जाँचबुझ प्रक्रिया पनि सुरु गर्ने तयारी भइरहेको जानकारी दिए ।