गाउँपालिकाद्वारा उत्कृष्ट कर्मचारी र जेहेन्दार विद्यार्थी पुरस्कृत

खोटाङ । खोटाङको जन्तेढुङ्गा गाउँपालिकाले वर्षभरि उत्कृष्ट कार्यसम्पादन गर्ने कर्मचारी र जेहेन्दार विद्यार्थीलाई नगद पुरस्कारसहित सम्मान गरेको छ । गाउँपालिकाले आयोजना गरेको सार्वजनिक सुनुवाइ कार्यक्रमको अवसर पारेर उनीहरूलाई पुरस्कृत गरिएको हो ।

गाउँपालिकाले कार्यसम्पादनका आधारमा ३ जना कर्मचारीलाई  ‘वर्ष उत्कृष्ट कर्मचारी पुरस्कार’ प्रदान गरेको छ । पुरस्कृत हुनेहरूमा गाउँपालिका कार्यालय चिसापानीमा कार्यरत अधिकृत स्तर छैटौँ भीम मगर, वडा नं. २ बोपुङकी वडा सचिव जिना राई र कार्यालय सहयोगी दिनेश विष्ट रहेका छन् । उनीहरूलाई जनही १० हजार रुपैयाँ नगद र प्रशंसा पत्र प्रदान गरियो ।

Advertisement

त्यसैगरी, शिक्षा क्षेत्रलाई प्रोत्साहन गर्ने उद्देश्यले गाउँपालिकाले विद्यालय शिक्षा परीक्षा (एसइई) र जिल्ला स्तरीय परीक्षा (डीएलइ) मा उत्कृष्ट अंक ल्याउने ५ जना विद्यार्थीलाई पनि सम्मान गरेको छ। एसइईतर्फ ३.५१ जिपिए ल्याउने सिंहदेवी माध्यमिक विद्यालय बोपुङकी दीपशिखा राई र ३.३२ जिपिए ल्याउने सोही विद्यालयका सुनिल कटुवाल पुरस्कृत भएका छन् ।

डिएलइ (कक्षा ८) तर्फ ३.६२ जिपिए ल्याउने गृष्मा राई, ३.६ जिपिए ल्याउने अविनाश राई (दुवै सिंहदेवी मावि) र ३.६ जिपिए नै ल्याउने चिसापानी नमुना माध्यमिक विद्यालयका संयोग पोखरेललाई पनि जनही १० हजार नगद र प्रमाणपत्रसहित सम्मान गरिएको छ।

पुरस्कार वितरण गर्दै गाउँपालिका अध्यक्ष अरुणादेवी राईले राम्रो काम गर्नेलाई प्रोत्साहन गर्ने पद्धतिले सुशासन र सेवा प्रवाहमा सुधार आउने बताइन् । ‘कर्मचारीको मनोबल बढाउन र विद्यार्थीहरूको शैक्षिक स्तर उकास्न गाउँपालिकाले बर्सेनि पुरस्कारको व्यवस्था गर्दै आएको छ,’ अध्यक्ष राईले भनिन् ।

कार्यक्रममा गाउँपालिकाका विभिन्न शाखा प्रमुखहरूले प्रगति विवरण प्रस्तुत गरेका थिए। प्रस्तुत विवरण अनुसार चालु आर्थिक वर्षको १० महिनामा गाउँपालिकाको समग्र भौतिक प्रगति ७५ प्रतिशत र आर्थिक प्रगति ६४ प्रतिशत पुगेको छ।