पहाडी र हिमाली भू–भागमा वर्षाको सम्भावना

मुलुकी खबर

२०८३ असार ३, बुधबार ०६:४५

काठमाडौं । नेपालमा आज (बुधबार) उपल्लो वायुमण्डलमा विकसित पश्चिमी न्यून चापीय रेखा (ट्रफ), स्थानीय वायु तथा पूर्वीय वायुको संयुक्त प्रभाव रहने भएकाले देशका विभिन्न क्षेत्रमा वर्षाको सम्भावना रहेको छ ।

जल तथा मौसम पूर्वानुमान महाशाखाले विशेषगरी पहाडी तथा हिमाली भू–भागमा मेघगर्जन र चट्याङसहित वर्षा हुने पूर्वानुमान गरेको छ । महाशाखाका अनुसार हाल देशका अधिकांश हिमाली तथा पहाडी भू–भागमा आंशिकदेखि साधारणतया बदलीको अवस्था रहेको छ ।

गण्डकी र बागमती प्रदेशका केही तराई क्षेत्रमा समेत बादल लागेको छ भने अन्य तराई भू–भागमा मौसम मुख्यतः सफा रहेको छ । बुधबार दिउँसो देशका हिमाली र पहाडी भू–भागमा साधारणतया बदली रहनेछ । कोशी, बागमती र गण्डकी प्रदेशका हिमाली तथा पहाडी क्षेत्रका थोरै स्थानमा मेघगर्जन, चट्याङसहित मध्यम वर्षा हुने सम्भावना रहेको छ ।

त्यस्तै लुम्बिनी, कर्णाली र सुदूरपश्चिम प्रदेशका हिमाली तथा पहाडी भू–भागका एक–दुई स्थानमा पनि यस्तै प्रकारको वर्षा हुन सक्ने अनुमान गरिएको छ । तराई क्षेत्रतर्फ हेर्दा कोशी प्रदेशका थोरै स्थान तथा मधेश प्रदेशका एक–दुई स्थानमा मेघगर्जन र चट्याङसहित मध्यम वर्षाको सम्भावना रहेको महाशाखाले जनाएको छ । साथै, लुम्बिनी र सुदूरपश्चिम प्रदेशका तराई भू–भागका केही स्थानमा तातो दिनको अवस्था कायम रहने सम्भावना रहेको छ ।

रातको मौसम पनि पहाडी तथा हिमाली क्षेत्रमा सक्रिय रहने देखिएको छ । पूर्वानुमानअनुसार राति देशका हिमाली र पहाडी भू–भाग तथा कोशी प्रदेशको तराई क्षेत्रमा साधारणतया बदली रहनेछ ।

कोशी र गण्डकी प्रदेशका हिमाली तथा पहाडी भू–भागका थोरै स्थानमा तथा बागमती प्रदेशका हिमाली तथा पहाडी भू–भागका एक–दुई स्थानमा मेघगर्जन र चट्याङसहित मध्यम वर्षा हुन सक्ने सम्भावना रहेको छ । कोशी प्रदेशको तराईका एक–दुई स्थानमा समेत वर्षा हुने अनुमान गरिएको छ ।

महाशाखाले मौसम प्रणालीको प्रभावका कारण वर्षा हुने क्षेत्रमा चट्याङ तथा स्थानीय रूपमा हुने मौसमजन्य जोखिमप्रति सतर्क रहन आग्रह गरेको छ । मौसममा सातै प्रदेश कुनै न कुनै रूपमा प्रभावित रहने भए पनि वर्षाको मुख्य प्रभाव पहाडी र हिमाली भू–भागमा केन्द्रित रहनेछ । तराई क्षेत्रमा वर्षासँगै कतिपय स्थानमा गर्मीको असर पनि कायम रहने पूर्वानुमान गरिएको छ ।

तपाइको प्रतिक्रिया