धनकुटामा खडेरी र फौजी किराको वितण्डा

धनकुटा । धनकुटाको पाख्रिबास र महालक्ष्मी नगरपालिकाका क्षेत्रमा फाैजी किराकाे आतंक देखिएकाे छ । खडेरीले मकैलाई क्षति पुर्याइरहेकाे अवस्थामा फौजी किराकाे प्रकाेप पनि देखिएकाे हाे ।

लामो समयदेखि पर्याप्त वर्षा नहुँदा फैलिएको फौजी किराको प्रकोपले गर्दा हुर्कँदै गरेको मकैबाली नष्ट हुन थालेको छ । हरियाली देखिनुपर्ने मकैबारी खडेरीले सुक्दै र किराले खाँदै गएपछि उजाड बनेको छ ।

Advertisement

पाख्रिबास–५ दियालेका किसान अम्बरबहादुर तामाङका अनुसार किराले मकैको पात र गुबो खाइदिएपछि बोट नै मर्ने समस्या देखिएको छ । १८ रोपनीमा लगाएको मकै नष्ट भएपछि उनलाई अब बीउ समेत जोगाउन मुस्किल परेको छ । अर्का किसान हरिबहादुर निरौला पनि मिहिनेत खेर गएको भन्दै आगामी दिनमा खाद्य संकट हुनेमा चिन्तित छन् ।

मकै मुख्य खाद्यान्न र वस्तुभाउको दानाको स्रोत भएकाले किसानहरूले तत्काल प्राविधिक सहायता र विषादी अभियान चलाउन माग गरेका छन् ।

कृषि ज्ञान केन्द्र धनकुटाका प्रमुख नगेन्द्रबहादुर रानामगरले भने गत वर्षको तुलनामा समस्या कम रहेको दाबी गरेका छन् । कतिपय ठाउँमा विषादी वितरण र बाली उपचार शिविर सञ्चालन भइरहेको उनले बताए । सीमित जनशक्तिका बाबजुद पनि नियन्त्रणको प्रयास भइरहेको र वर्षा सुरु भएपछि प्रकोप घट्दै जाने केन्द्रको भनाइ छ ।