कांग्रेसको सहमहामन्त्रीमा तीन महिला नेतृको उम्मेदवारी घोषणा

काठमाडौं । नेपाली कांग्रेसको सहमहामन्त्री पदका लागि तीन महिला नेतृले उम्मेदवारी घोषणा गरेका छन् । केन्द्रीय कार्यसमितिमा रहेका प्रतिमा गौतम, ईश्वरी न्यौपाने र सीता गुरुङले सहमहामन्त्री पदमा उम्मेदवारी दिने घोषणा गरेका हुन् ।

गौतम २०७९ सालको प्रतिनिधिसभा निर्वाचनमा समानुपातिकतर्फबाट सांसद बनेकी थिइन् । उनी नेपाल विद्यार्थी संघकी पूर्वमहामन्त्रीसमेत हुन् ।

त्यस्तै, न्यौपाने कांग्रेसकी प्रतिनिधिसभाकी पूर्वसचेतक तथा राज्य व्यवस्था तथा सुशासन समितिकी पूर्वसभापति हुन् । उनी पटक–पटक कांग्रेसको केन्द्रीय सदस्यसमेत भइसकेकी छन् ।

उम्मेदवारी घोषणा गर्दै न्यौपानेले कांग्रेसलाई लोकप्रिय र बलियो पार्टीका रूपमा स्थापित गर्न आफूले भूमिका निर्वाह गर्ने बताइन् । ‘नेपाली कांग्रेसलाई लोकप्रिय पार्टी निर्माण गर्ने, संगठनलाई अझ मजबुत बनाउने र देशकै नम्बर एक पार्टीका रूपमा स्थापित गर्ने अभियानमा मेरो महत्वपूर्ण भूमिका रहनेछ,’  उनले भनिन्। उनले आफूलाई मतदान गरी अवसर प्रदान गर्न महाधिवेशन प्रतिनिधिहरूसँग अपिलसमेत गरेकी छन् ।

कांग्रेसकी केन्द्रीय सदस्य तथा पूर्वमन्त्री सीता गुरुङले पनि सहमहामन्त्री पदमा उम्मेदवारी घोषणा गरेकी छन् । गुरुङ प्रतिनिधिसभामा समानुपातिक तथा प्रत्यक्ष दुवै प्रणालीबाट सांसद बनेकी थिइन् । २०७९ सालमा पुष्पकमल दाहाल  ‘प्रचण्ड’ नेतृत्वको सरकारमा उनी सहरी विकासमन्त्री बनेकी थिइन् ।

नेपाली कांग्रेसको केन्द्रीय कार्यसमितिमा ८ जना सहमहामन्त्री रहने व्यवस्था छ । त्यसमध्ये एक पद महिलाका लागि आरक्षित गरिएको छ । आगामी महाधिवेशनमा महिला सहमहामन्त्रीका लागि तीन नेतृबीच प्रतिस्पर्धा हुने देखिएको छ ।