विराट फुटसल च्याम्पियनसिपको उपाधि विराटनगरलाई

विराटनगर । घरेलु टोली विराटनगरले तेस्रो विराट फुटसल च्याम्पियनसिपको उपाधि जितेको छ। मन्जिना फाउन्डेसनले आयोजना गरेको प्रतियोगिताको फाइनलमा बेलबारीलाई पराजित गर्दै विराटनगरले उपाधि चुमेको हो ।

विराटनगरस्थित जाम्बोरे फुटसल कोर्टमा भएको रोमाञ्चक फाइनल खेलमा विराटनगरले बेलबारीलाई ५–३ को गोल अन्तरले पराजित गर्दै उपाधि जित्यो । मोरङका ६ वटा टोली सहभागी रहेको एक दिने प्रतियोगितामा विराटनगरले उत्कृष्ट प्रदर्शन गर्दै उपाधिमा कब्जा गरेको हो ।

उपाधिसँगै विजेता विराटनगरले नगद २५ हजार रुपैयाँ, मेडल र ट्रफी प्राप्त गरेको छ। त्यसैगरी, उपविजेता बनेको बेलबारीले नगद १५ हजार रुपैयाँसहित मेडल र ट्रफीमा चित्त बुझायो।

प्रतियोगिताका विजेता तथा उपविजेता टोलीलाई कोशी प्रदेश खेलकुद विकास बोर्डकी उपाध्यक्ष सन्तोषी श्रेष्ठ, मन्जिना फाउन्डेसनका अध्यक्ष जतिन ताम्राकार लगायतले पुरस्कार तथा प्रमाणपत्र प्रदान गरे ।