भेनेजुएलामा शक्तिशाली भूकम्पको दोहोरो धक्का, काराकासका भवनमा क्षति

एजेन्सी । भेनेजुएलामा लगातार दुई शक्तिशाली भूकम्प गएपछि राजधानी काराकाससहित विभिन्न क्षेत्रमा त्रास फैलिएको छ । अमेरिकी भूगर्भ सर्वेक्षण (यूएसजीएस)का अनुसार बुधबार राति क्रमशः ७.२ र ७.५ म्याग्निच्युडका भूकम्प मापन गरिएको हो ।

पहिलो भूकम्प सान फेलिपे नजिक र त्यसको केही समयपछि दोस्रो भूकम्प युमारे क्षेत्र आसपास केन्द्रित भएको यूएसजीएसले जनाएको छ । प्रारम्भिक मूल्यांकनअनुसार भूकम्पबाट ठूलो मानवीय तथा भौतिक क्षति भएको हुन सक्छ ।

शक्तिशाली कम्पनपछि काराकासका केही भवनमा क्षति पुगेको छ । सर्वसाधारण घरबाहिर निस्किएर खुला स्थानमा आश्रय लिन बाध्य भएका छन् । उद्धारकर्मी तथा सुरक्षाकर्मीहरू प्रभावित क्षेत्रमा परिचालित भएका छन् । क्षतिको यथार्थ विवरण संकलन भइरहेको छ ।

भेनेजुएलाका आन्तरिक मामिला मन्त्री डियोस्डाडो काबेलोले राजधानीको अल्टामिरा क्षेत्रमा विशेष क्षति पुगेको जानकारी दिएका छन् । केही व्यक्ति घाइते भएको हुन सक्ने बताउँदै उनले आपतकालीन सवारीसाधनलाई सहज आवागमनमा सहयोग पुर्याउन सर्वसाधारणसामु आग्रह गरेका छन् ।

यसैबीच, भूकम्पपछि पोर्टो रिको र भर्जिन आइल्यान्डका लागि जारी गरिएको सुनामी चेतावनी पछि रद्द गरिएको छ । क्षतिको पूर्ण विवरण आउन भने अझै केही समय लाग्ने अधिकारीहरूले बताएका छन् ।