स्पेनले तोड्यो १६ वर्षको प्रतीक्षा

अमेरिका । फिफा विश्वकप २०२६ को नकआउट चरणमा स्पेनले प्रभावशाली प्रदर्शन गर्दै १६ वर्षपछि पहिलो पटक जित हात पारेको छ ।

शुक्रबार बिहान सम्पन्न प्रि–क्वाटरफाइनल खेलमा अस्ट्रियालाई ३–० ले पराजित गर्दै स्पेनले सन् २०१० पछि विश्वकपको नकआउट चरणमा पहिलो विजय दर्ता गरेको हो । सन् २०१० मा दक्षिण अफ्रिकामा भएको विश्वकपको फाइनलमा नेदरल्यान्ड्सलाई हराउँदै विश्वविजेता बनेपछि स्पेनले विश्वकपका नकआउट खेलमा लगातार निराशा बेहोर्दै आएको थियो ।

यसपटक भने त्यो लामो प्रतीक्षाको अन्त्य गर्दै स्पेनले क्वाटरफाइनलतर्फ आत्मविश्वासपूर्ण यात्रा तय गरेको छ । अब स्पेनले अन्तिम आठमा स्थान सुरक्षित गर्नका लागि पोर्चुगल र क्रोएसियाबीचको विजेतासँग प्रतिस्पर्धा गर्नेछ ।

लस एन्जलस स्टेडियममा भएको खेलमा स्पेनले सुरुदेखि नै बलमाथि नियन्त्रण कायम गर्दै अस्ट्रियामाथि निरन्तर दबाब सिर्जना गरेको थियो । त्यसको प्रतिफलस्वरूप ३६औं मिनेटमा मिकेल ओयाजाबालले टोलीलाई अग्रता दिलाए । मार्क कुकुरेलाको सटिक पासमा ओयाजाबालले सहज फिनिस गर्दै स्पेनलाई १–० को अवस्थामा पुर्‍याएका थिए ।

यो गोल स्पेनका लागि ऐतिहासिक पनि बन्यो । किनभने सन् २०१० को विश्वकप फाइनलमा आन्द्रेस इनिएस्टाले गरेको निर्णायक गोलपछि विश्वकपको नकआउट चरणमा स्पेनले पहिलो पटक गोल गर्न सफल भएको थियो ।

यद्यपि, पहिलो हाफमा स्पेनले थप केही उत्कृष्ट अवसर सिर्जना गरेको थियो । २९औं मिनेटमा मार्क कुकुरेलाले गोल गरे पनि स्पेनका खेलाडीले अस्ट्रियाका गोलकिपरलाई अवरोध पुर्‍याएको ठहर गर्दै रेफ्रीले उक्त गोललाई मान्यता दिएनन् ।

त्यसपछि ३३औं मिनेटमा ओयाजाबालको अर्को आकर्षक प्रहारलाई अस्ट्रियाका गोलकिपर अलेजान्डर स्लागाले उत्कृष्ट बचाउ गरे । पहिलो हाफको इन्जुरी समयको दोस्रो मिनेटमा एलेक्स बाएनाको फ्रिकिक क्रसबारमा लागेर फर्किएको थियो भने त्यसैको रिबाउन्डमा लामिन यमालले गरेको प्रहार पनि स्लागाले रोक्दै आफ्नो टोलीलाई थप संकटबाट जोगाएका थिए ।

पहिलो हाफ १–० ले अगाडि रहेको स्पेनले दोस्रो हाफमा पनि आफ्नो आक्रामक खेललाई निरन्तरता दियो । खेलको ६६औं मिनेटमा एलेक्स बाएनाको क्रसमा पेड्रो पोरोले उत्कृष्ट फिनिस गर्दै स्पेनको अग्रता २–० पुर्‍याए । स्पेनको राष्ट्रिय टोलीका लागि पोरोको यो पहिलो अन्तर्राष्ट्रिय गोल पनि बनेको छ ।

खेलको अन्तिम समयमा ओयाजाबाल पुनः चम्किए । ८९औं मिनेटमा उनले व्यक्तिगत दोस्रो गोल गर्दै स्पेनको जितलाई ३–० मा सुरक्षित बनाए । ओयाजाबालको दुई गोलको मद्दतमा स्पेनले प्रभावशाली जित निकाल्दै विश्वकप उपाधितर्फको यात्रालाई थप मजबुत बनाएको छ ।

अस्ट्रियाले केही अवसर सिर्जना गर्ने प्रयास गरे पनि स्पेनको सुदृढ रक्षापंक्ति तथा बलमाथिको नियन्त्रणका कारण खेलमा फर्किन सकेन । स्पेनले आक्रमण, मिडफिल्ड र रक्षापंक्तिमा सन्तुलित प्रदर्शन गर्दै विश्व फुटबलका उपाधि दाबेदारमध्ये एक भएको संकेत पनि दिएको छ ।

१६ वर्षदेखि विश्वकपको नकआउट चरणमा जितविहीन रहेको इतिहास अन्त्य गरेसँगै स्पेन अब क्वाटरफाइनलमा पनि त्यही लय कायम राख्ने लक्ष्यसहित मैदान उत्रिनेछ ।