वर्षाले मेलम्चीको पानी धमिलिएपछि काठमाडौंमा खानेपानी वितरण रोकियो

काठमाडौं । निरन्तर वर्षासँगै मेलम्ची खानेपानी आयोजनाको मुहान आसपासमा आएको बाढीका कारण काठमाडौं उपत्यकामा मेलम्चीबाट भइरहेको खानेपानी आपूर्ति अस्थायी रूपमा बन्द गरिएको छ ।

मेलम्ची आयोजनाको मुहानमा बाढी पसेर पानी अत्यधिक धमिलो बनेपछि प्रशोधन गर्न कठिन भएको भन्दै काठमाडौं उपत्यका खानेपानी लिमिटेड (केयूकेएल)ले शुक्रबारदेखि सुन्दरीजलस्थित प्रशोधन केन्द्रतर्फ पानीको प्रवाह रोकिएको जनाएको हो । केयूकेएलका प्रवक्ता वीरबहादुर चन्दका अनुसार मुहानबाट आउने पानीको गुणस्तर बिग्रिएकाले तत्काल प्रशोधन गरी वितरण गर्न सम्भव नभएको हो ।

उनका अनुसार पानीको धमिलोपन कम भई गुणस्तर सामान्य अवस्थामा फर्किएपछि पुनः प्रशोधन प्रक्रिया सुरु गरिनेछ र पूर्वनिर्धारित वितरण तालिकाअनुसार उपत्यकामा खानेपानी आपूर्ति सञ्चालन गरिनेछ । प्रवक्ता चन्दले निरन्तर वर्षा भइरहे मुहानको अवस्था सामान्य हुन समय लाग्न सक्ने बताए ।

त्यसैले मेलम्चीको पानीमा निर्भर रहेका काठमाडौं उपत्यकाका विभिन्न क्षेत्रमा केही समय खानेपानी आपूर्तिमा समस्या हुन सक्ने उनले जानकारी दिए । केयूकेएलले मौसममा सुधार र मुहानको पानीको गुणस्तर सामान्य भएपछि मात्रै आपूर्ति पुनः सञ्चालन गरिने जनाएको छ ।