हालान्डको दुई गोलमा ब्राजिल स्तब्ध, पहिलो पटक विश्वकपको क्वाटरफाइनलमा पुग्यो नर्वे

अमेरिका । एर्लिङ हालान्डको उत्कृष्ट प्रदर्शनमा नर्वेले पाँच पटकको विश्व विजेता ब्राजिललाई २–१ ले पराजित गर्दै फिफा विश्वकप २०२६ को क्वाटरफाइनलमा ऐतिहासिक स्थान बनाएको छ ।

चौथो पटक विश्वकप खेलिरहेको नर्वे पहिलो पटक अन्तिम आठमा पुगेको हो । ब्राजिल ३६ वर्षपछि अन्तिम १६ बाटै बाहिरिएको छ । अमेरिकाको न्युयोर्क–न्यु जर्सी स्टेडियममा सोमबार राति भएको खेलमा दुवै गोल हालान्डले दोस्रो हाफको अन्तिम ११ मिनेटमा गरे ।

उनले ७९औं मिनेटमा आन्द्रेस सेलड्रुपको पासलाई सदुपयोग गर्दै पहिलो गोल गरे भने ९०औं मिनेटमा हेडमार्फत व्यक्तिगत दोस्रो गोल गर्दै नर्वेको जित सुनिश्चित गरे । दुवै गोलका लागि सेलड्रुपले नै निर्णायक पास उपलब्ध गराएका थिए ।

ब्राजिलले इन्जुरी समयको नवौं मिनेटमा नेमारको पेनाल्टी गोलमार्फत अन्तर घटाए पनि हार टार्न सकेन । खेलको सुरुमै अग्रता लिने अवसर भने ब्राजिलले गुमाएको थियो । १४औं मिनेटमा ब्रुनो गिमारेसले प्रहार गरेको पेनाल्टी नर्वेका गोलकिपर ओर्यान न्याल्यान्डले सानदार बचाउ गरेका थिए । त्यससँगै ब्रुनो पछिल्लो ४० वर्षमा विश्वकपमा पेनाल्टी मिस गर्ने ब्राजिलका पहिलो खेलाडी बने ।

पूरै खेलमा नर्वेले उत्कृष्ट प्रदर्शन गर्दै ६५ प्रतिशत बल आफ्नो नियन्त्रणमा राख्यो । नर्वेले ९ प्रहारमध्ये ५ वटा लक्ष्यमा राख्दा ब्राजिलका १४ प्रहारमध्ये ४ वटा मात्र पोस्टतर्फ थिए । दोस्रो हाफमा मैदान प्रवेश गरेका एन्ड्रिकले पनि उत्कृष्ट अवसर सदुपयोग गर्न नसक्दा ब्राजिल थप दबाबमा परेको थियो ।

यस जितसँगै नर्वेले ब्राजिलविरुद्धको अपराजित यात्रा पाँच खेलसम्म पुर्‍याएको छ । विश्व फुटबलमा ब्राजिलले अहिलेसम्म सामना गरेका विभिन्न राष्ट्रमध्ये नर्वेलाई मात्र हराउन नसकेको तथ्य पनि कायम रह्यो । अब नर्वेले क्वाटरफाइनलमा मेक्सिको र इंग्ल्यान्डबीचको विजेतासँग प्रतिस्पर्धा गर्नेछ ।

हालान्डका लागि यो विश्वकप अझ विशेष बनेको छ । उनले ब्राजिलविरुद्ध दुई गोल थप्दै प्रतियोगितामा आफ्नो गोल संख्या सात पुर्‍याएका छन् । उनी फ्रान्सका कप्तान किलियन एमबाप्पे र अर्जेन्टिनाका कप्तान लियोनल मेसीसँग संयुक्त रूपमा सर्वाधिक गोलकर्ताको सूचीमा छन् । हालान्डले आफू खेलेका चारै खेलमा गोल गर्दै गोल्डेन बुटको दाबेदारी पनि बलियो बनाएका हुन् ।

यता २००२ यता विश्वकप उपाधिविहीन रहेको ब्राजिलको अर्को अभियान पनि निराशामै टुंगिएको छ । १९९० पछि पहिलो पटक अन्तिम १६ बाटै बाहिरिएको ब्राजिलले यस संस्करणमा अपेक्षित प्रदर्शन गर्न नसक्दा विश्व फुटबलकै सबैभन्दा ठूलो उलटफेरमध्येको नतिजा व्यहोरेको छ ।