कांग्रेसले क्रियाशील सदस्यता नवीकरणको म्याद साउन ३ गतेसम्म बढायो

ललितपुर । नेपाली कांग्रेसले क्रियाशील सदस्यता अध्यावधिक (नवीकरण) गर्ने समय पुनः थप गर्दै आगामी साउन ३ गतेसम्म कायम गरेको छ । यसअघि असार २० गतेसम्म तोकिएको समयावधि वर्षायामका कारण आवश्यक प्रक्रिया पूरा गर्न कठिनाइ भएको भन्दै बढाइएको हो ।

सोमबार पार्टीको केन्द्रीय कार्यालय बीपी स्मृति भवन बीपी नगर सानेपामा महामन्त्री तथा सदस्यता व्यवस्थापन केन्द्रीय समितिका संयोजक प्रदीप पौडेलको अध्यक्षतामा बसेको बैठकले समय थप गर्ने निर्णय गरेको हो । निर्णयअनुसार नवीकरण गर्न छुट भएका सदस्य तथा नयाँ क्रियाशील सदस्यहरूको विवरण अनलाइन प्रणालीमार्फत पार्टीको केन्द्रीय सदस्यता प्रणालीमा प्रविष्ट गर्न साउन ३ गतेसम्मको अवसर दिइएको छ ।

पार्टीका कार्यवाहक मुख्यसचिव कृष्णप्रसाद दुलालका अनुसार वडा र क्षेत्रीय तहमा सदस्यतासम्बन्धी प्रक्रिया अझै पूरा हुन बाँकी रहेकाले नयाँ सदस्यता विस्तारलाई प्रभावकारी बनाउन पर्याप्त सूचना प्रवाह जारी रहेकाले तथा विभिन्न जिल्लामा खटिएका केन्द्रीय प्रतिनिधिहरूबाट प्राप्त सुझावका आधारमा समयावधि थप गरिएको हो ।

कांग्रेसले सदस्यता अध्यावधिक तथा वितरणका क्रममा कुनै समस्या वा गुनासो देखिएमा सम्बन्धित जिल्लामा खटिएका केन्द्रीय प्रतिनिधिमार्फत सदस्यता व्यवस्थापन केन्द्रीय समितिसमक्ष सिफारिस गर्न सकिने व्यवस्था पनि गरेको छ । प्राप्त सिफारिसका आधारमा समितिले आवश्यक निर्णय गरी सदस्यता अध्यावधिकको प्रक्रिया सहज बनाउने जनाएको छ ।