विराटनगरको कोशी अस्पतालमा उपचाररत ज्यान मुद्दाका बन्दीको मृत्यु

विराटनगर । विराटनगरको कोशी अस्पतालमा उपचाररत ज्यान मुद्दाका एक जना बन्दीको बुधबार बिहान मृत्यु भएको छ । पाँचथरको हिलिहाङ गाउँपालिका–१ घर भएका ३१ वर्षीय सन्देश राईको मृत्यु भएको हो ।

कर्तव्य ज्यान मुद्दाका बन्दी रहेका राईलाई उपचारका लागि असार १८ गते कोशी अस्पतालमा भर्ना गरिएको थियो । उपचारकै क्रममा बुधबार बिहान ५ बजेतिर मृत्यु भएको मोरङ कारागारका प्रशासक राजन घिमिरले बताए ।

राईलाई जिल्ला अदालत पाँचथरले थुनामा राखेर मुद्दाको पुर्पक्ष गर्न २०८२ मंसिर ७ गते आदेश दिएको थियो । अदालतको आदेशसँगै जिल्ला कारागार पाँचथरमा राखिएका उनी बिरामी परेपछि जिल्ला अस्पताल फिदिममा उपचार गराइएको थियो ।

फिदिममा सम्भव नभएपछि थप उपचारका लागि विराटनगर रेफर गरियो । विराटनगर ल्याएर असार १८ गते कोशी अस्पताल भर्ना गरिएको थियो । उपचाररत अवस्थामा राईको सुरक्षा व्यवस्था भने मोरङ कारागारले मिलाउँदै आएको कारागार प्रशासक घिमिरेले बताए ।

‘सन्देश राई पाँचथर कारागारकै बन्दी हुन् । उपचारका लागि विराटनगर ल्याइएको हो । उपचारका क्रममा उनको सुरक्षाका लागि कर्मचारी र सुरक्षाकर्मी मात्रै मोरङ कारागारबाट खटाइएको हो,’ घिमिरेले भने । उनका अनुसार उपचारमा संलग्न चिकित्सकले राईलाई मुटु, म्रिगौला र फोक्सोको पुरानै समस्या रहेको बताएका छन् ।

उनलाई पछिल्लो समय अचानक सास फेर्न गाह्रो हुने र शरीर सुन्निने समस्या देखिएको कारागारले जनाएको छ । राईविरुद्धको कर्तव्य ज्यान मुद्दा जिल्ला अदालत पाँचथरमा विचाराधीन छ । मुद्दा विचाराधीन हेकै अवस्थामा उनको मृत्यु भएको छ ।

राईको मृत्युको जानकारी उनको परिवारका सदस्य र आफन्तलाई दिइसकिएको कारागारले जनाएको छ । मोरङ कारागारका प्रशासक घिमिरेले राईको शव पाँचथर कारागारलाई नै जिम्मा लगाइने बताए । ‘हामी शव पाँचथरलाई जिम्मा लगाउँछौं । अरु प्रक्रिया उतैबाट अघि बढ्छ,’ उनले भने ।