बिहीबारको मौसम : ६ प्रदेशमा भारी वर्षाको सम्भावना

काठमाडौं । देशभर मनसुनी वायुको प्रभाव कायम रहँदा आज (बिहीबार) दिनभर र राति पनि अधिकांश स्थानमा बदली तथा वर्षाको क्रम जारी रहने भएको छ ।

मौसम पूर्वानुमान महाशाखाका अनुसार मनसुनको न्यून चापीय रेखा पूर्वी र पश्चिमी भू–भागतर्फ आफ्नो औसत अवस्थाकै आसपास रहेकाले वर्षाको सम्भावना रहेको हो । हाल बागमती, गण्डकी र लुम्बिनी प्रदेशका केही स्थानसहित अन्य प्रदेशका थोरै क्षेत्रमा मध्यम वर्षा भइरहेको छ ।

दिउँसो पहाडी र हिमाली भू–भागका विभिन्न स्थानमा चट्याङसहित वर्षाको सम्भावना रहेको छ । मधेश तथा कोशी, बागमती, गण्डकी, लुम्बिनी र सुदूरपश्चिमका तराई क्षेत्रमा पनि वर्षा हुन सक्ने जनाइएको छ ।

विशेषगरी बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी क्षेत्रका एक–दुई स्थानमा भारी वर्षाको सम्भावना रहेको छ । लुम्बिनी र सुदूरपश्चिमका तराई क्षेत्रमा हावाहुरी चल्न सक्ने भएकाले सतर्कता अपनाउन महाशाखाले आग्रह गरेको छ ।

रातको समयमा पनि अधिकांश भू–भागमा बदली रहनेछ । कोशी, बागमती र गण्डकीका हिमाली क्षेत्रसहित लुम्बिनी, कर्णाली र सुदूरपश्चिमका हिमाली भू–भागमा वर्षाको सम्भावना छ । त्यस्तै, मधेश प्रदेश तथा कोशी, बागमती, गण्डकी, लुम्बिनी र सुदूरपश्चिमका पहाडी र तराई क्षेत्रमा मध्यम वर्षा हुन सक्ने अनुमान गरिएको छ ।

राति कोशी, बागमती, गण्डकी, लुम्बिनी र सुदूरपश्चिमका केही स्थानमा भारी वर्षा हुने सम्भावना रहेको छ । कोशी र गण्डकीका पहाडी क्षेत्रमा एक–दुई स्थानमा धेरै भारी वर्षासमेत हुन सक्ने भएकाले नदीनाला आसपास र पहिरोको जोखिम भएका क्षेत्रमा विशेष सावधानी अपनाउन आग्रह गरिएको छ ।