कोशीको सम्भावित सत्ता समीकरण : नेकपालाई फकाउँदै कांग्रेस–एमाले

विराटनगर । नेपाली कांग्रेसले प्रदेश तहमा नेकपा (एमाले)सँगको सहकार्य तोड्ने भएपछि सातवटै प्रदेश सरकारको समीकरण फेरिने भएको छ । कांग्रेसले एमालेसँगको सहकार्य तोड्ने निर्णय गरेपछि कोशीमा मुख्यमन्त्री एवं एमाले सचिव हिक्मतकुमार कार्की नेतृत्वको सरकार संकटमा परेको छ ।

२०८१ असार १७ गतेको कांग्रेसका तत्कालीन सभापति शेरबहादुर देउवा र एमालेका अध्यक्ष केपी शर्मा ओलीबीच संघ र प्रदेशमा आलोपालो सरकार सञ्चालन गर्ने सहमति भएको थियो । सहमति अनुसार सञ्चालन भइरहेको संघीय सरकार जेनजी आन्दोलनको बलमा अपदस्थ भयो । प्रदेशमा दुई दलबीच सहकार्य जारी थियो । बुधबार कांग्रेसले सहकार्य तोड्ने निर्णय गरेपछि कोशीमा कांग्रेसका मन्त्रीले राजीनामा दिने तयारी गरेका छन् । हिक्मतकुमार कार्की नेतृत्वको प्रदेश सरकारमा २०८१ भदौ २८ गते नेपाली कांग्रेस सहभागि भएको थियो । सम्भवतः बिहीबार कांग्रेसका मन्त्रीहरुले राजीनामा दिने छन् ।

पार्टी केन्द्रले एमालेसँगको सहकार्य तोड्ने निर्णय गरे पनि कांग्रेस कोशी प्रदेश संसदीय दलले आधिकारिक जानकारी नआएको बताएको छ । कांग्रेस संसदीय दलका प्रमुख सचेतक गोपाल तामाङका अनुसार पार्टीको निर्णयका विषयमा अनौपचारिक जानकारी आएको छैन । मौखिम जानकारी आएपछि पार्टीको कार्यदलको बैठक बोलाइएको उनले बताए ।

कांग्रेसले बनाएको कार्यदलमा पार्टी प्रदेश पदाधिकारी र संसदीय दलका पदाधिकारी र सिनियर नेता सदस्य छन् । ‘अहिले आधिकारिक कुनै निर्णय भएको छैन । बिहीबार भोलि पार्टीको कार्यदलको बैठक बोलाइएको छ । आधिकारिक निर्णय पनि बिहीबार नै होला,’ प्रमुख सचेतक तामाङले भने ।

एमालेका प्रमुख सचेतक रमेशकुमार बस्नेतका अनुसार एमाले पनि कांग्रेसको स्पष्ट निर्णय पर्खिएर बसेको छ । आधिकारिक विषय बाहिर आएपछि एमालेले थप विषयमा छलफल अघि बढाउने उनले बताए ।

९३ सदस्यीय कोशी प्रदेशसभामा बहुमतका लागि ४७ सांसदको समर्थन आवश्यक पर्छ । हाल प्रदेशसभामा नेकपा एमालेका ४० र नेपाली कांग्रेसका २९ सांसद छन् । दुई ठूला दलबीचको सहकार्य टुटेपछि अब १७ सिट भएको ‘निर्णायक शक्ति’ नेपाली कम्युनिष्ट पार्टी (नेकपा)तिर दुवै दलको नजर सोझिएको छ ।

सरकार टिकाउनका लागि एमालेलाई नेकपाको साथ अनिवार्य छ । नयाँ सरकार बनाउन कांग्रेसका लागि पनि नेकपाकै समर्थन निर्णायक हुनेछ । ४० सिट भएको एमालेले १७ सिटको नेकपासँग मिलेमा झण्डै दुईतिहाइ पुग्ने बलियो अवस्था रहन्छ । कांग्रेस (२९)ले नेकपा (१७) र साना दलहरूसँग मिलेर बहुमत पुर्‍याउन कसरत गर्नुपर्ने हुन्छ । यही अंकगणितका कारण एमाले र कांग्रेस दुवै दलका नेताहरूले अहिले नेकपाका नेताहरूलाई आफ्नो पक्षमा पार्न तीव्र संवाद सुरु गरेका छन् । अर्थात्, कोशीको सम्भावित सत्ता समीकरणका लागि कांग्रेस र एमालेले नेकपालाई फकाउन थालेका छन् ।

नेकपा संसदीय दलका नेता इन्द्रबहादुर आङ्बोले अहिलेको तरल अवस्थामा आफ्नो दल ‘पर्ख र हेर’को स्थितिमा रहेको बताए । यद्यपि, उनले वैचारिक रूपमा कम्युनिष्ट घटक भएकाले कांग्रेसभन्दा एमालेसँग सहकार्य गर्न सहज हुने संकेत गरेका छन् । ‘कांग्रेसले समर्थन फिर्ता लिएपछि एमालेले कसरी प्रस्ताव अघि बढाउँछ भन्ने कुरा हेर्न बाँकी छ,’ आङ्बोले भने, ‘नेताहरूबीच संवाद भइरहे पनि औपचारिक निर्णय हुन बाँकी छ ।’

सातै प्रदेशमा कांग्रेस–एमाले गठबन्धन भंग, प्रदेश सरकारहरु संकटमा