प्रतिनिधिसभा साउन १४ सम्म स्थगित

काठमाडौं । प्रतिनिधिसभाको बैठक आगामी साउन १४ गतेसम्मका लागि स्थगित गरिएको छ । सभामुख डीपी अर्यालले आगामी बैठक साउन १४ गते बस्ने जानकारी गराउँदै तत्काललाई बैठक स्थगित भएको घोषणा गरेका हुन् ।

बैठक स्थगित गर्दै सभामुख अर्यालले सांसदहरूलाई संसद् नचलेको अवधिमा आफ्ना निर्वाचन क्षेत्र र जनतामाझ पुग्न आग्रह गरे । उनले नागरिकका समस्या, गुनासा र आवश्यकताबारे प्रत्यक्ष जानकारी लिएर आगामी बैठकमा सरकारको ध्यानाकर्षण गराउन सांसदहरूलाई सुझाव दिए ।

यसअघि प्रतिनिधिसभा बैठक सुरु हुनुअघि कार्यव्यवस्था परामर्श समितिको बैठक बसेको थियो । उक्त बैठकमा प्रतिनिधिसभाको अर्को बैठक साउन १४ गते बोलाउने सहमति भएको थियो । त्यसअनुसार सभामुखले प्रतिनिधिसभाको आगामी बैठक साउन १४ गते बस्ने सूचना सदनमा सुनाएका हुन् ।