एम्सका डा. यादव आबद्धः विपन्न बिरामीलाई निःशुल्क उपचार गर्ने पारस अस्पतालकाे प्रतिबद्धता

विराटनगर । विराटनगर–११ स्थित पारस मल्टिस्पेसलिटी अस्पतालले आफ्नो विशेषज्ञ स्वास्थ्य सेवालाई थप सुदृढ बनाउँदै भारतको एम्स अस्पतालका वरिष्ठ चिकित्सक डा. विमलेश यादवलाई भित्र्याएको छ । वरिष्ठ फिजिसियन डा. यादवले शुक्रबारबाट औपचारिक रूपमा आफ्नो सेवा पारस अस्पतालबाट सुरु गरेको छन् ।

विशेषज्ञ चिकित्सकको आगमनसँगै अस्पतालले सामाजिक उत्तरदायित्वअन्तर्गत आर्थिक रूपमा विपन्न र असहाय बिरामीलाई निःशुल्क उपचार सेवा उपलब्ध गराउने बताएको छ । अस्पतालमा आयोजित स्वागत कार्यक्रममा अस्पतालका संस्थापक अध्यक्ष डा. सफिउर रहमानले एम्समा लामो अनुभव सँगालेका डा. यादवको आबद्धताले पूर्वी नेपालका बिरामीले अब आफ्नै दैलोमा अन्तर्राष्ट्रिय स्तरको उपचार पाउने बताए । ‘मधुमेह, उच्च रक्तचाप, थाइराइड र जटिल आन्तरिक रोगको उपचारका लागि अब भारत वा काठमाडौं धाउनुपर्ने बाध्यता अन्त्य हुनेछ,’ उनले प्रस्टाए ।

स्वास्थ्य सेवालाई सेवामूलक बनाउने उद्देश्यका साथ पत्रकारहरूको स्वास्थ्य सुरक्षालाई ध्यानमा राख्दै निःशुल्क उपचारको व्यवस्था गरिएको अध्यक्ष रहमानले स्पष्ट पारे । सोही अवसरमा अस्पतालका डा. मुनेश्वर साहलाई मेडिकल डाइरेक्टरको जिम्मेवारी सुम्पिएको घोषणा गरिएको थियो । अस्पतालका प्रमुख कार्यकारी अधिकृत (सीईओ) हेमनारायण मेहताले तीन वर्ष नपुग्दै अस्पतालले ठूलो फड्को मारेको जानकारी दिए । १६ जना कर्मचारीबाट सुरु भएको यस अस्पतालमा हाल १३६ जना जनशक्ति कार्यरत छन् । ५० शय्याबाट सुरु भएको अस्पताललाई निकट भविष्यमै ३ सय शय्याको बहु विशेषज्ञ अस्पतालका रूपमा विकास गर्ने योजना रहेको मेहताले सुनाए । उनका अनुसार हाल अस्पतालमा उपचार गराउनेमध्ये करिब ८० प्रतिशत बिरामी सीमावर्ती भारतीय सहरहरूबाट आउने गरेका छन् ।

डा. यादवले एम्समा आर्जन गरेको ज्ञान र सीपलाई यहाँका बिरामीको सेवामा पूर्ण रूपमा समर्पित गर्ने प्रतिबद्धता व्यक्त गरे । अत्याधुनिक उपकरण र थप विशेषज्ञ सेवा विस्तारमा केन्द्रित पारस अस्पतालले पछिल्लो समय विशिष्टीकृत उपचारका लागि आफूलाई अब्बल साबित गर्दै लगेको छ ।