सेना प्रमुखसँगको मतभेदपछि रक्षामन्त्री बर्खास्त

एजेन्सी । युक्रेनका राष्ट्रपति भोलोदिमिर जेलेन्स्कीले सेना प्रमुखसँगको बढ्दो मतभेदपछि रक्षामन्त्री मिखाइलो फेडोरोभलाई पदबाट हटाएका छन् । नियुक्ति भएको करिब ६ महिनामै उनलाई बर्खास्त गरिएको अन्तर्राष्ट्रिय सञ्चारमाध्यमहरूले जनाएका छन् ।

रक्षामन्त्री हटाउने निर्णयपछि राजधानी किभसहित ओडेसा, ल्भिभ र खार्किभमा विरोध प्रदर्शन भएको छ । रुस–युक्रेन युद्ध सुरु भएयता सरकारविरुद्ध भएको यो पहिलो ठूलो सार्वजनिक प्रदर्शन मानिएको छ । किभमा ठूलो संख्यामा प्रदर्शनकारी सडकमा उत्रिएर राष्ट्रपति जेलेन्स्कीको निर्णयको विरोध गरेका थिए ।

Advertisement

जेलेन्स्कीको कदमले राजनीतिक विश्लेषक, सेनाका केही अधिकारी र नागरिक समाजको एक वर्गमा असन्तुष्टि बढाएको छ । केही समयदेखि रक्षामन्त्री फेडोरोभ र युक्रेनी सेना प्रमुख ओलेक्जान्डर सिर्स्कीबीच रणनीति र नेतृत्व शैलीलाई लिएर मतभेद रहेको चर्चा हुँदै आएको थियो ।

बिहीबार फेडोरोभले आफूले राष्ट्रपति जेलेन्स्कीसँग सेना प्रमुख सिर्स्की र जनरल स्टाफ प्रमुख एन्ड्री हनाटोभलाई हटाउन आग्रह गरेको खुलासा गरे । तर, राष्ट्रपति त्यसमा सहमत नभएपछि आफूले सिर्स्कीसँगै काम गर्नुपर्ने अवस्था आएको उनले बताए ।

फेडोरोभले सेना प्रमुख सिर्स्कीमाथि फरक रणनीति अपनाएर रुसविरुद्धको युद्धलाई प्रभावकारी रूपमा अघि बढाउनुको सट्टा देशभित्र विभाजन सिर्जना गरेको आरोपसमेत लगाए । यता, बेलायतका प्रधानमन्त्री किअर स्टार्मरसँग किभमा आयोजित संयुक्त पत्रकार सम्मेलनमा राष्ट्रपति जेलेन्स्कीले रक्षा मन्त्रालय र जनरल स्टाफबीच विभिन्न तहमा लामो समयदेखि द्वन्द्व रहेको स्वीकार गरेका छन् ।

यद्यपि, उनले रक्षामन्त्रीलाई हटाउने निर्णयको विस्तृत कारण भने सार्वजनिक गरेका छैनन् । रक्षा मन्त्रालयको नेतृत्व परिवर्तनसँगै युक्रेनको युद्ध रणनीति, सैन्य नेतृत्व र आन्तरिक राजनीतिक अवस्थाका बारेमा नयाँ चासो थपिएको छ ।