नेपाली कांग्रेसको संस्थापन इतर पक्षकाे राष्ट्रिय भेला घोषणा

काठमाडौं । नेपाली कांग्रेसभित्रको संस्थापन इतर पक्षले आगामी साउन २९ गते काठमाडौंमा राष्ट्रिय भेला गर्ने घोषणा गरेको छ । जननायक बीपी कोइरालाको ४४औँ स्मृति दिवसका अवसरमा बुधबार काठमाडौंमा आयोजित एक कार्यक्रममा नेता प्रकाशमान सिंहले उक्त भेलाबारे जानकारी दिएका हुन् ।

पार्टीभित्रको आन्तरिक रणनीति र आगामी कार्यदिशा तय गर्न सातै प्रदेशमा प्रादेशिक भेलाहरू सम्पन्न गरिसकेको यो समूहले अब केन्द्रीयस्तरको भेला गर्न लागेको हो ।

Advertisement

कार्यक्रमलाई सम्बोधन गर्दै नेता सिंहले भने, ‘हामीले सातै प्रदेशमा भेलाहरू सफलतापूर्वक सम्पन्न गरिसकेका छौं । साउन २९ गते काठमाडौंमा हुने राष्ट्रिय भेलापछि हामी आफ्नो स्पष्ट बाटो तय गर्नेछौं ।’

नेता सिंहले पार्टीको आगामी १५औँ महाधिवेशनलाई विशेष महत्त्व दिँदै यसलाई ‘एकताको महाधिवेशन’ बनाउनुपर्नेमा जोड दिए । उनले इतर पक्षको उद्देश्य पार्टीलाई थप सुदृढ र एकताबद्ध बनाउनु रहेको समेत स्पष्ट पारे ।

कांग्रेसभित्रको शक्ति सन्तुलन र महाधिवेशनको पूर्वतयारीका रूपमा हेरिएको यो भेलालाई राजनीतिक वृत्तमा अर्थपूर्ण रूपमा लिइएको छ । भेलाले पार्टीभित्रको संस्थापन पक्षसँगको असहमति र आगामी सांगठनिक सुधारका एजेन्डाहरूलाई साझा धारणाका रूपमा अघि सार्ने बताइएकाे छ ।