इलाममा बोलेरो दुर्घटना, चालकसहित ७ जना घाइते

इलाम । इलाम नगरपालिका–८ स्थित बज्रदेवी क्षेत्रमा बोलेरो गाडी दुर्घटना हुँदा चालकसहित ७ जना घाइते भएका छन् ।

जिल्ला प्रहरी कार्यालय इलामका अनुसार झापाबाट इलामतर्फ आउँदै गरेको प्र १–०१–००१ ज ४१३२ नम्बरको बोलेरो उकालो सडकमा अनियन्त्रित भई करिब ६० फिट तल खसेर बिहीबार दिउँसो करिब १ बजेतिर दुर्घटनामा परेको हो । दुर्घटनाको सूचना प्राप्त हुनासाथ जिल्ला प्रहरी कार्यालय इलामबाट इन्स्पेक्टरको नेतृत्वमा टोली घटनास्थल पुगेर घाइतेहरूको उद्धार गरेको थियो । सबै घाइतेलाई उपचारका लागि जिल्ला अस्पताल इलाम पठाइएको प्रहरीले जनाएको छ ।

Advertisement

घाइते हुनेमा झापाको कन्काई नगरपालिका–९ का ४० वर्षीय नाजु आलम (टाउकोमा चोट, मध्यम अवस्था), सोही स्थानका ४७ वर्षीय गोपालप्रसाद दुलाल (निधार र दाहिने काँधमा चोट, सामान्य), सुनसरीको धरान उपमहानगरपालिका–१० की ३६ वर्षीया रिता चेम्जोङ (टाउको, निधार, दाहिने हात र बायाँ खुट्टामा चोट, सामान्य), गाडी चालक पाँचथरको फाल्गुनन्द गाउँपालिका–५ का ३३ वर्षीय रमेश चेम्जोङ (बायाँ खुट्टामा चोट, सामान्य), झापाको दमक नगरपालिका–७ का २२ वर्षीय रोहिन लावती (निधारमा चोट, सामान्य), सुनरीको धरान उपमहानगरपालिका–१० का ७३ वर्षीय महेश कुमार राई (टाउको, छाती र ढाडमा चोट, मध्यम) तथा उनका ३४ वर्षीय छोरा मनकुमार राई (दाहिने पातामा चोट, सामान्य) रहेका छन् । प्रहरीका अनुसार सबै घाइते उपचाररत छन् भने दुर्घटनाको थप अनुसन्धान भइरहेको छ ।