बंगलादेशका राष्ट्रपति शाहाबुद्दिनले दिए राजीनामा, सभामुखले सम्हाल्नेछन् कार्यभार

काठमाडौं । बंगलादेशका राष्ट्रपति मोहम्मद शाहाबुद्दिनले स्वास्थ्य समस्याका कारण शुक्रबार पदबाट राजीनामा दिएका छन् । राष्ट्रपतिको कार्यालयले विज्ञप्ति जारी गर्दै उनको राजीनामाका बारेमा जानकारी दिएको हो ।

७६ वर्षीय शाहाबुद्दिनले अप्रिल २०२३ देखि बंगलादेशको सेरेमोनियल राष्ट्रपतिको जिम्मेवारी सम्हाल्दै आएका थिए । उनको कार्यकालका क्रममा सन् २०२४ मा विद्यार्थी नेतृत्वको आन्दोलनपछि तत्कालीन प्रधानमन्त्री शेख हसिना देश छाडेर भारत गएपछि बंगलादेशमा राजनीतिक अस्थिरता चुलिएको थियो ।

Advertisement

राष्ट्रपतिका प्रेस सचिवद्वारा जारी विज्ञप्तिअनुसार शाहाबुद्दिनलाई ‘अटोनोमिक न्युरोप्याथी’ नामक रोग लागेको पुष्टि भएको छ । उनले स्वास्थ्य परीक्षणपछि आफूलाई उक्त रोग देखिएको र त्यसका कारण कहिलेकाहीँ केही क्षणका लागि चेतनाहीन हुने अवस्था आउने बताएका छन् ।

उनले विज्ञप्तिमार्फत भनेका छन्, ‘हालै गरिएको स्वास्थ्य परीक्षणबाट मलाई अटोनोमिक न्युरोप्याथी लागेको पुष्टि भएको छ । यसका कारण म कहिलेकाहीँ केही समयका लागि चेतनाहीन हुने गर्छु ।’

शाहाबुद्दिनको राजीनामासँगै शेख हसिनाको राजनीतिक प्रभाव उच्च सरकारी तहबाट थप कमजोर भएको विश्लेषण गरिएको छ । हसिना स्वदेश फर्किने योजना सार्वजनिक भएको करिब पाँच महिना बाँकी रहँदा सरकारको शीर्ष तहमा उनका निकट मानिने कुनै पनि व्यक्ति नरहने अवस्था बनेको छ ।

यसअघि हसिनाको आवामी लिग पार्टीमाथि प्रतिबन्ध लगाइसकिएको छ । सन् २०२४ मा उनको सरकार ढाल्ने विद्यार्थी आन्दोलनपछि पार्टीका धेरै नेता तथा कार्यकर्ता पक्राउ परेका छन् भने केही अझै लुकेर बसिरहेका छन् ।

राष्ट्रपतिको कार्यालयका अनुसार नयाँ राष्ट्रपति निर्वाचित नभएसम्म बंगलादेशका सभामुखले राष्ट्रपतिको कार्यभार सम्हाल्नेछन् ।