स्क्यामिङ जालोबाट ८६० नेपाली स्वदेश फर्काइए, कम्बोडियाको जेलमा अझै ४९ नागरिक

काठमाडौं । दक्षिण–पूर्वी एसियाका विभिन्न मुलुकमा सञ्चालित अनलाइन स्क्यामिङ नेटवर्कमा फसेका ८६० जना नेपालीको उद्धार गरिएको छ ।

परराष्ट्र मन्त्रालयले शुक्रबार पत्रकार सम्मेलनमार्फत उद्धारको पछिल्लो विवरण सार्वजनिक गर्दै अझै कम्बोडियाको जेलमा ४९ जना नेपाली रहेको जनाएको छ । मन्त्रालयका प्रवक्ता लोकबहादुर पौडेलका अनुसार उद्धार गरिएकामध्ये सबैभन्दा धेरै ७३३ जना कम्बोडियाबाट स्वदेश फर्काइएका छन् ।

Advertisement

त्यस्तै, म्यानमारबाट ११३ जना, लाओसबाट ८ जना र थाइल्यान्डबाट ६ जनाको उद्धार गरिएको उनले जानकारी दिए । कम्बोडियाको जेलमा रहेका ४९ नेपालीको रिहाइ तथा आवश्यक कानुनी प्रक्रियाका लागि नेपाली दूतावासले स्थानीय निकायसँग समन्वय गरिरहेको मन्त्रालयले जनाएको छ ।

परराष्ट्र मन्त्रालयले अनलाइन स्क्यामिङका नाममा गैरकानुनी रूपमा विदेश पठाउने गिरोहविरुद्ध कानुनी कारबाही अघि बढाउन पीडितका परिवार तथा आफन्तलाई यथार्थ विवरणसहित नेपाल प्रहरी र सम्बन्धित निकायमा उजुरी दिन आग्रह गरेको छ । मन्त्रालयमा उद्धारका लागि निवेदन दिनुअघि मानव तस्करी वा अवैध रूपमा विदेश पठाउने व्यक्तिविरुद्ध कानुनी प्रक्रिया सुरु गर्नुपर्नेमा पनि जोड दिइएको छ ।

यसैबीच, मन्त्रालयले मध्यपूर्वमा जारी द्वन्द्वको अवस्थालाई सरकारले नजिकबाट निगरानी गरिरहेको जनाएको छ । प्रवक्ता पौडेलले शान्ति सम्झौताको प्रभावकारी कार्यान्वयन हुन नसक्दा द्वन्द्व थप लम्बिन सक्ने संकेत देखिएको र त्यसले नेपाली नागरिकको सुरक्षा, रोजगारी तथा नेपालको अर्थतन्त्रमा समेत असर पार्न सक्ने बताए ।

उनका अनुसार हालसम्म मध्यपूर्वमा रहेका नेपाली नागरिक प्रत्यक्ष रूपमा प्रभावित भएको कुनै सूचना प्राप्त भएको छैन । सरकारले त्यहाँ रहेका नेपालीको अवस्थाका बारेमा निरन्तर निगरानी गरिरहेको पनि उनले जानकारी दिए ।

मन्त्रालयले वार्ता र कूटनीतिक माध्यमबाट मात्रै दीर्घकालीन शान्ति सम्भव हुने विश्वास व्यक्त गर्दै ‘स्ट्रेट अफ होर्मुज’ जलमार्गको निर्बाध सञ्चालन तथा क्षेत्रीय शान्ति कायम गर्ने अन्तर्राष्ट्रिय प्रयासमा नेपालको समर्थन रहेको दोहोर्याएको छ ।