पाँच प्रदेशमा सत्ता बाँडफाँट, दुई प्रदेशका लागि थप छलफलको सहमति

काठमाडौं । नेकपा (एमाले) र नेपाली कम्युनिष्ट पार्टी (नेकपा) बीच सबै प्रदेश सरकारमा संयुक्त रूपमा सहकार्य गर्ने सहमति भएको छ ।

प्रदेश सरकारहरूलाई स्थिर, प्रभावकारी र विकासमुखी बनाउने उद्देश्यसहित दुई दलले सत्ता साझेदारीको समझदारी गरेका हुन् । शनिबार सार्वजनिक गरिएको सहमतिपत्रमा प्रदेशसभामा देखिएको बजेट निर्माणसम्बन्धी असमझदारी, बजेटविहीन अवस्था तथा अस्वस्थ राजनीतिक प्रतिस्पर्धाको अन्त्य गर्दै राजनीतिक स्थिरता, सुशासन, समृद्धि र प्रादेशिक विकासलाई अघि बढाउने लक्ष्य राखिएको उल्लेख गरिएको छ ।

Advertisement

सहमतिअनुसार प्रदेशसभामा दुवै दलले संयुक्त सरकार गठन गर्नेछन् । कोशी, बागमती र लुम्बिनी प्रदेशको मुख्यमन्त्री एमालेले नेतृत्व गर्नेछ भने कर्णाली र सुदूरपश्चिम प्रदेश सरकारको नेतृत्व नेकपाले गर्ने सहमति भएको छ ।

मधेश र गण्डकी प्रदेशमा भने सरकार गठनका विषयमा प्रदेशसभामा प्रतिनिधित्व गर्ने अन्य राजनीतिक दलहरूसँग समेत परामर्श गरी नेतृत्व र सरकारमा सहभागिताको स्वरूप टुंग्याइने सहमतिमा उल्लेख छ । दुई दलबीच भएको सहमतिपत्रमा पूर्वप्रधानमन्त्री एवं एमाले अध्यक्ष केपी शर्मा ओली र पूर्वप्रधानमन्त्री एवं नेकपा संयोजक पुष्पकमल दाहाल ‘प्रचण्ड’ले हस्ताक्षर गरेका छन् ।