यस्तो रहनेछ मौसम, कहाँ–कहाँ हुँदैछ वर्षा ?

मुलुकी खबर

२०८३ श्रावण १०, आइतबार ०६:१९

काठमाडौं । देशभर मनसुनी प्रणाली सक्रिय रहेकाले आज (आइतबार) पनि अधिकांश स्थानमा वर्षाको सम्भावना रहेको छ । जल तथा मौसम पूर्वानुमान महाशाखाका अनुसार मनसुनको न्यून चापीय रेखा पश्चिम नेपालमा सरदरभन्दा केही उत्तरतर्फ र पूर्वी नेपालमा सरदर स्थानकै आसपास रहेकाले देशभर मौसममा यसको प्रभाव देखिएको हो ।

हाल गण्डकी, लुम्बिनी, कर्णाली र सुदूरपश्चिम प्रदेशका अधिकांश पहाडी तथा हिमाली क्षेत्रमा सामान्यदेखि पूर्ण बदली रहेको छ । कोशी र बागमती प्रदेशका पहाडी तथा हिमाली भू–भागमा पनि बादल लागेको छ भने तराईका अधिकांश स्थानमा आंशिक बदली छ । कर्णाली र सुदूरपश्चिमका केही स्थान तथा बागमती, गण्डकी र लुम्बिनीका एक–दुई स्थानमा हल्का वर्षा भइरहेको महाशाखाले जनाएको छ ।

महाशाखाका अनुसार दिउँसो देशका पहाडी र हिमाली भू–भागका केही स्थानमा मेघगर्जन र चट्याङसहित मध्यम वर्षा हुने सम्भावना छ । उच्च हिमाली क्षेत्रमा हल्का हिमपात पनि हुन सक्ने जनाइएको छ । कोशी र सुदूरपश्चिमका केही तराई क्षेत्र तथा मधेश, बागमती, गण्डकी र लुम्बिनी प्रदेशका एक–दुई स्थानमा पनि मेघगर्जनसहित वर्षा हुन सक्छ ।

गण्डकी र कर्णाली प्रदेशका पहाडी तथा हिमाली भू–भागका एक–दुई स्थानमा भारी वर्षाको सम्भावना रहेको महाशाखाले जनाएको छ । राति पनि देशभर मौसम पूर्ण रूपमा खुल्ने सम्भावना नरहेको महाशाखाको भनाइ छ ।

कोशी, बागमती र गण्डकी प्रदेशका पहाडी तथा हिमाली क्षेत्रका केही स्थानमा तथा लुम्बिनी, कर्णाली र सुदूरपश्चिमका थोरै स्थानमा मेघगर्जनसहित मध्यम वर्षा हुन सक्ने अनुमान गरिएको छ । तराईका क्षेत्रमा पनि कोशी, बागमती र गण्डकीका केही स्थान तथा मधेश, लुम्बिनी र सुदूरपश्चिमका एक–दुई स्थानमा वर्षाको सम्भावना रहेको छ ।

रातिको समयमा कोशी, बागमती र गण्डकी प्रदेशका पहाडी तथा हिमाली भू–भागमा भारी वर्षा हुन सक्ने भएकाले ती क्षेत्रका बासिन्दालाई विशेष सतर्कता अपनाउन महाशाखाले आग्रह गरेको छ । विशेषगरी बागमती, गण्डकी, कोशी र कर्णाली प्रदेशका पहाडी क्षेत्रमा भारी वर्षापछि पहिरो, बाढी, गेग्रान बहाव तथा भू–क्षयको जोखिम बढ्न सक्ने भएकाले आवश्यक सावधानी अपनाउन मौसमविद्ले सुझाव दिएका छन् ।

यस्ता मौसमीय गतिविधिले सडक तथा हवाई यातायात, कृषि, पर्यटन, पर्वतारोहण र दैनिक जनजीवनमा समेत प्रभाव पार्न सक्ने भएकाले विभागले पछिल्ला मौसम सूचना नियमित रूपमा हेर्न आग्रह गरेको छ ।

तपाइको प्रतिक्रिया