गोलीकाण्डको भर्त्सना, निष्पक्ष छानबिनको माग

इनरुवा । राष्ट्रिय स्वतन्त्र पार्टी (रास्वपा) का सांसद लालविक्रम थापाले सुनसरीको कप्तानगञ्जमा प्रहरीको गोलीबाट २४ वर्षीय ओमप्रकाश मेहताको मृत्यु तथा अन्य व्यक्ति घाइते भएको घटनाप्रति भर्त्सना गरेका छन् ।

झडपस्थलमा सोमबार सञ्चारकर्मीसँग कुरा गर्दै क्षेत्र नम्बर २ का सांसद थापाले सामान्य विवादका क्रममा छातीलगायत शरीरका अङ्ग ताकेर सिधै गोली चलाइएको आरोप लगाए । उनले थप व्यक्ति हताहत भएको हुन सक्ने आशङ्का व्यक्त गर्दै घटनाबारे प्रमुख जिल्ला अधिकारी र प्रहरी उपरीक्षकले जिम्मेवार जवाफ नदिएको भन्दै असन्तुष्टि जनाए ।

Advertisement

सांसद थापाले मृतकका परिवारलाई न्याय दिलाउन निष्पक्ष छानबिन गरी दोषीमाथि कारबाही गर्न माग गरे। साथै, घाइतेहरूको उपचारका लागि आवश्यक समन्वय गर्ने प्रतिबद्धता पनि व्यक्त गरेका छन्।

डिजे बजाउने विषयमा भएको विवाद उग्र बन्दै झडपमा परिणत भएपछि स्थिति नियन्त्रणमा लिन प्रहरीले गोली चलाएको थियो । घटनापछि सुरक्षा संवेदनशीलतालाई ध्यानमा राख्दै प्रशासनले उक्त क्षेत्रमा अनिश्चितकालीन कर्फ्यु जारी गरेको छ ।