कप्तानगन्जको अवस्था नियन्त्रणबाहिर, स्थानीयका पसलमा तोडफोड सुरु

मुलुकी खबर

२०८३ श्रावण ११, सोमबार ११:२९

विराटनगर । सुनसरीको देवानगन्ज गाउँपालिका–३ कप्तानगन्जको अवस्था सुरक्षाकर्मीको नियन्त्रणबाहिर पुगेको छ । ठूलो संख्यामा नेपाल र सशस्त्र प्रहरी परिचालन गरिएको भए पनि परिस्थिति निक्कै असामान्य र जटिल बनेको हो ।

आइतबार रातिको हिंसात्मक झडपपछि लगाइएको कर्फ्यु सोमबार बिहानैदेखि प्रभावहीन बन्दै गएको थियो । कर्फ्यु आदेशको उल्लंघन गर्दै प्रदर्शनमा उत्रिएको भिडले स्थानीयका पसलमा तोडफोड र आगजनी सुरु गरेपछि कप्तानगन्जको अवस्था नियन्त्रणबाहिर पुगेको छ । भिडलाई सुरक्षाकर्मीले नियन्त्रणमा लिने प्रयास गरे पनि सम्भव भइरहेको छैन । भिडले स्थानीयका पसलहरु तोडफोड गर्न थालेका छन् ।

सोमबार बिहान करिब १० बजेदेखि कर्फ्यु आदेशलाई चुनौती दिँदै चारदेखि पाँच सय जनाको समूह सडकमा उत्रिएको थियो । प्रदर्शनकारीले कप्तानगन्ज चोकमा टायर बालेर नाराबाजी गर्नुका साथै स्थानीयका पाँचवटा पसलमा तोडफोड गरेका छन् । एउटा फार्मेसी, एउटा मोटरसाइकल मर्मत गर्ने ग्यारेज र तीनवटा किराना पसलमा तोडफोड भएको प्रहरीले जनाएको छ ।

पसलहरुमा आक्रमण गरी सामान बाहिर निकालेर आगो लगाइएको सुरक्षा स्रोतले जनाएको छ । पसलहरुमा आक्रमण हुन थालेपछि स्थानीय आतंकित भएका छन् । डराएर सर्वसाधारणबीच भागदौड मच्चिन थालेको छ ।

प्रदर्शनकारीले लगातार तोडफोड र आगजनी गर्न थालेपछि कप्तानगन्ज बजार क्षेत्र तनावग्रस्त बनेको हो । एउटा पक्ष प्रदर्शनमा उत्रिएसँगै अर्को पक्ष पनि भेला हुन थालेको छ । तत्काल स्थिति नियन्त्रणमा लिन नसकिए थप हिंसात्मक घटना हुन सक्ने जोखिम बढेको सुरक्षा अधिकारीहरूको भनाइ छ ।

स्थानीय प्रशासनले सोमबार बिहान ७ बजेदेखि लागू हुने गरी अनिश्चितकालीन कर्फ्यु आदेश जारी गरे पनि त्यसको उल्लंघन गर्दै प्रदर्शन जारी छ । घटनास्थलमा नेपाल प्रहरी र सशस्त्र प्रहरीको ठूलो संख्या परिचालन गरिएको छ। सुरक्षाकर्मीले प्रदर्शनकारीलाई सम्झाइबुझाइ गरेर स्थिति नियन्त्रणमा लिन प्रयास गरिरहेका छन् । यद्यपि, प्रदर्शनकारी पछि हटेका छैनन् ।

घटनाको विरोधमा सुनसरीको लौकही र फूलचोकमा पनि टायर बालेर प्रदर्शन गरिएको छ । प्रदर्शनका कारण पूर्व–पश्चिम लोकमार्गमा बिहानैदेखि सवारी आवागमन प्रभावित भएको छ । राजमार्गमा सवारी साधन रोकिँदा यात्रुहरू समस्यामा परेका छन् ।

आइतबार राति कप्तानगन्जमा दुई समुदायबीच भएको हिंसात्मक झडप नियन्त्रणका क्रममा सुरक्षाकर्मीले गोली चलाउँदा देवानगन्ज गाउँपालिका–३ का २४ वर्षीय ओमप्रकाश मेहताको मृत्यु भएको थियो । गोली लागेर नौ जना सर्वसाधारण घाइते भएका छन्, जसमध्ये एक जनाको अवस्था गम्भीर छ । सर्वसाधारण र सुरक्षाकर्मीसहित २२ जनाभन्दा बढी घाइते भएको सुरक्षा स्रोतले जनाएको छ । घाइतेहरूको विराटनगरस्थित विभिन्न अस्पतालमा उपचार भइरहेको छ ।

घटनापछि जिल्ला प्रशासन कार्यालय सुनसरीले हरिनगरा गाउँपालिकाको घुस्की, भुटाहा, कप्तानगन्ज तथा देवानगन्ज बजार क्षेत्रमा अनिश्चितकालीन कर्फ्यु आदेश जारी गरेको थियो । प्रमुख जिल्ला अधिकारी बासुदेव घिमिरेले स्थानीय प्रशासन ऐन, २०२८ बमोजिम कर्फ्यु लागू भएका क्षेत्रमा आवतजावत, भेला, जुलुस, प्रदर्शन, सभा तथा अन्य सार्वजनिक गतिविधिमा पूर्ण रोक लगाइएको बताएका छन् ।

तर, कर्फ्यु लागू भएको केही घण्टामै प्रदर्शन चर्किएपछि सुरक्षा चुनौती थपिएको छ । कोशी प्रदेशका सशस्त्र प्रहरी प्रमुख डीआईजी मनीष थापाका अनुसार अवस्था नियन्त्रणका लागि नेपाल प्रहरी र सशस्त्र प्रहरीको थप टोली परिचालन गरिएको छ ।

‘अहिलेसम्म सुरक्षा निकायले स्थिति नियन्त्रणमा राख्ने प्रयास गरिरहेको हो । टायर बालेर प्रदर्शन र तोडफोड सुरु भएपछि थप सुरक्षाकर्मी परिचालन गरिएको छ,’ उनले भने ।

कोशी प्रदेशका विभिन्न जिल्लास्थित नेपाल प्रहरी, सशस्त्र प्रहरी तथा दंगा नियन्त्रणका टोलीहरूलाई पनि कप्तानगन्जतर्फ पठाइएको छ । थप सुरक्षा बल परिचालन गर्ने क्रम जारी रहेको सुरक्षा स्रोतले जनाएको छ ।

जिल्ला सुरक्षा समितिले पनि आकस्मिक बैठक गरी सुरक्षा व्यवस्था अझ कडा बनाउने निर्णय गरेको छ । प्रहरीका अनुसार अवस्था नियन्त्रणमा ल्याउने प्रयास जारी रहे पनि कप्तानगन्जको सुरक्षा अवस्था अझै अत्यन्त संवेदनशील रहेको छ ।

तपाइको प्रतिक्रिया