देवानगन्ज गोलीकाण्डको विरोध देशव्यापी बन्दै : विराटनगरमा बजार बन्द, सुनसरीमा राजमार्ग ठप्प, सिरहासम्म फैलियो आन्दोलन

विराटनगर । सुनसरीको देवानगन्ज गाउँपालिका–३ कप्तानगन्जमा प्रहरीको गोली लागेर २५ वर्षीय ओमप्रकाश मेहताको मृत्यु भएको र ९ जना घाइते भएको घटनाको विरोधमा मंगलबार कोशी प्रदेशका विभिन्न जिल्ला र मधेश प्रदेशको सिरहासम्म आन्दोलन चर्किएको छ ।

विराटनगरमा बजार बन्द गराउँदै प्रदर्शन गरिएको छ । सुनसरीमा सडकमा टायर बालेर प्रदर्शन गर्दै पूर्व–पश्चिम राजमार्ग अवरुद्ध गरिएको छ । सिरहामा पनि राजमार्ग बन्द गरी विरोध प्रदर्शन गरिएको छ ।

Advertisement

विराटनगरमा आन्दोलनकारीहरूले हनुमान मन्दिरबाट प्रदर्शन सुरु गर्दै ट्राफिक चोक, महेन्द्र चोकलगायतका मुख्य बजार क्षेत्र परिक्रमा गरेका थिए । प्रदर्शनका क्रममा उनीहरूले व्यापारीहरूलाई पसल बन्द गर्न आग्रह गरेका थिए । जसका कारण बजारको जनजीवन आंशिक रूपमा प्रभावित भएको थियो । प्रदर्शन पुनः हनुमान मन्दिरमै पुगेर सम्पन्न भएको थियो ।

आन्दोलनरत पक्षले विराटनगरको बुधहाट चोकमा दिउँसो ४ बजे श्रद्धाञ्जली सभाको आयोजना गर्ने कार्यक्रम पनि तय गरेको छ । प्रदर्शन शान्तिपूर्ण भए पनि कुनै अप्रिय घटना हुन नदिन उल्लेख्य संख्यामा नेपाल प्रहरी र सशस्त्र प्रहरी परिचालन गरिएको थियो । बजार क्षेत्र, प्रदर्शनस्थल तथा संवेदनशील स्थानहरूमा सुरक्षा व्यवस्था कडा पारिएको छ ।

सुनसरीमा मंगलबार पनि आन्दोलन जारी रहेको छ । प्रदर्शनकारीहरूले पकलीदेखि कोशी ब्यारेजसम्म पूर्व–पश्चिम राजमार्गका विभिन्न स्थानमा टायर बालेर सडक अवरुद्ध गरेका छन् । सडक अवरोधका कारण यातायात सेवा प्रभावित भएको छ । स्थिति थप तनावपूर्ण हुन नदिन स्थानीय प्रशासनले इटहरीबाट पश्चिमतर्फ जाने सवारीसाधन सञ्चालनमा रोक लगाएको छ ।

सुरक्षा अवस्थालाई मध्यनजर गर्दै जिल्ला प्रशासन कार्यालयले हरिनगरा, भुटाहा, कप्तानगन्ज, घुस्की र देवानगन्ज क्षेत्रमा कर्फ्यू आदेश जारी गरेको छ । कर्फ्यू लागू भएका क्षेत्रमा भेला, जुलुस, प्रदर्शन तथा आवतजावतमा पूर्ण प्रतिबन्ध लगाइएको छ । तर, पनि प्रदर्शन रोकिएको छैन ।

प्रदर्शनकारीहरूले कप्तानगन्ज गोलीकाण्डमा संलग्न दोषीमाथि निष्पक्ष छानबिन र कानुनी कारबाहीको माग गर्दै न्याय नपाएसम्म आन्दोलन जारी रहने चेतावनी दिएका छन् । कप्तानगन्ज घटनाको प्रभाव सिरहासम्म पुगेको छ ।

सिरहाको गोलबजार नगरपालिका–८ पुरानो चोक चोहर्वामा स्थानीयहरूले पूर्व–पश्चिम राजमार्ग अवरुद्ध गरेर प्रदर्शन गरेका छन् । प्रदर्शनकारीहरूले घटनाको निष्पक्ष छानबिन, गोली चलाउनेमाथि कारबाही तथा प्रहरी दमन बन्द गर्नुपर्ने माग राखेका छन् । उनीहरूले प्रधानमन्त्री र गृहमन्त्रीको राजीनामासमेत माग गरेका थिए ।

यसअघि सोमबार पनि सिरहाको कर्जन्हा नगरपालिका–बन्दीपुरस्थित पूर्व–पश्चिम राजमार्ग, गोलबजारको गोलपार्क तथा धनगढीमाई नगरपालिका–८ कसहा चोकमा विरोध प्रदर्शन भएको थियो । सिरहा प्रहरीका अनुसार आन्दोलनकारीहरूले करिब आधा घण्टा राजमार्ग अवरुद्ध गरेका थिए । प्रदर्शनकारीसँगको छलफलपछि सडक पुनः सञ्चालनमा आएको प्रहरीले जनाएको छ ।

गत आइतबार राति सुनसरीको देवानगन्ज–३ कप्तानगन्जमा दुई समूहबीच भएको झडप नियन्त्रण गर्ने क्रममा प्रहरीले चलाएको गोली लागेर देवानगन्ज–४ का ओमप्रकाश मेहताको मृत्यु भएको थियो । सो घटनापछि सुनसरी, मोरङ, सप्तरी, सिरहा, पर्सालगायत विभिन्न जिल्लामा लगातार विरोध प्रदर्शन भइरहेका छन् ।

आन्दोलनकारीहरूले दोषीमाथि निष्पक्ष छानबिन र कानुनी कारबाहीको मागलाई थप सशक्त बनाएका छन् । आन्दोलनका नाममा आक्रमण, आगजनी, तोडफोड र कुटपिटका घटना पनि भएका थिए ।