मोरङमा ट्रकले किच्दा युवकको मृत्यु, पोस्टमार्टमपछि खुल्यो घटनाको वास्तविकता

विराटनगर । मोरङको बुढीगंगा गाउँपालिका–४ स्थित अगुर दाना मिलअगाडि ट्रकले किच्दा एक युवकको मृत्यु भएको छ । प्रारम्भिक रूपमा लडेर मृत्यु भएको भनिए पनि पोस्टमार्टमपछि ट्रकले किचेको खुलासा भएको छ ।

सुनसरीको गढी गाउँपालिका–२ घर भई बुढीगंगा–५ दीपु टोलस्थित ससुरालीमा बस्दै आएका ३५ वर्षीय सुरज ऋषिदेव साउन १० गते आइतबार साँझ ६ः३० बजेतिर लडिरहेको घाइते अवस्थामा भेटिएका थिए । घटनाको जानकारी पाउनसाथ इलाका प्रहरी कार्यालय नेमुवाबाट खटिएको टोलीले तत्काल उद्धार गरेर ऋषिदेवलाई उपचारका लागि विराट शिक्षण अस्पताल पुर्याएको थियो ।

Advertisement

अस्पताल पुर्याउनसाथ चिकित्सकले उनलाई मृत घोषणा गरेका थिए । त्यसपछि शवलाई पोस्टमार्टमका लागि विराटनगरको कोशी अस्पताल पठाइएको थियो । पोस्टमार्टम रिपोर्टमा उनको मृत्यु सामान्य रूपमा लडेर नभई अन्य कारणबाट भएको देखिएपछि प्रहरीले घटनाको थप अनुसन्धान अघि बढाएको थियो ।

अनुसन्धानका क्रममा ना ७ ख ७८८ नम्बरको ट्रक रोकी राखिएको अवस्थामा मृतक ट्रकको चक्कामुनि गएर सुतेको र चालकले त्यसका बारेमा थाहा नपाई ट्रक अगाडि बढाउँदा चक्काले किचेर उनको मृत्यु भएको खुलेको प्रहरीले जनाएको छ । घटनामा संलग्न ट्रक र चालक झापाको कचनकवल गाउँपालिका–१ का ३० वर्षीय हरि थापालाई प्रहरीले मंगलबार दिउँसो नियन्त्रणमा लिएको छ ।

प्रहरीले चालकको लापरबाहीका कारण घटना भएको जनाएको छ । मोरङ प्रहरीका सूचना अधिकारी डीएसपी मकेन्द्रकुमार मिश्रले घटनाको विस्तृत अनुसन्धान भइरहेको जानकारी दिए । शवको पोस्टमार्टमपछि घटनाको वास्तविकता खुलेसँगै दुर्घटना गराउने ट्रक र चालकलाई पक्राउ गरिएको उनले बताए ।