देवानगन्ज झडप : दुई जना घाइतेको अवस्था गम्भीर, कम्तीमा २० घरमा क्षति

विराटनगर । सुनसरीको देवानगन्ज गाउँपालिकाको देवानगन्ज बजारमा मंगलबार साँझ दुई पक्षबीच भएको दोहोरो झडपमा परेर दुई जना घाइते भएका छन् । घाइतेहरुको अवस्था गम्भीर छ ।

देवानगन्ज बजारमा मंगलबार साँझ ७ बजेदेखि करिब अढाई घण्टा लगातार झडप, आक्रमण, आगजनी र तोडफोड भएको थियो । उक्त झडपमा परेर देवानगन्ज–२ का अन्दाजी ४६ वर्षीय राजी मियाँ र ५१ वर्षीय आलम अन्सारी घाइते भएको सुनसरी प्रहरीका सूचना अधिकारी डीएसपी चन्द्रबहादुर खड्काले बताए ।

Advertisement

टाउको, छाती, खुट्टा लगायत शरीरका विभिन्न भागमा चोट लागेर अवस्था गम्भीर रहेका उनीहरुको विराटनगरस्थित प्राइम अस्पतालमा उपचार भइरहेको छ । परिस्थिति असामान्य बनेका कारण समयमा एम्बुलेन्स पाउन नसक्दा दुवै जना घाइतेलाई उपचारका लागि अस्पताल पुर्यायाउन ढिला भएको प्रहरीले जनाएको छ ।

उनीहरुलाई बुधबार बिहानका राति करिब १ बजेतिर अस्पताल पुर्याइएको थियो । गम्भीर अवस्थामा उपचाररत उनीहरुको परिवारका सदस्यले कुनै पनि भिडभाडमा नगएका बेला एक्कासि आएर दुवै जनामाथि आक्रमण गरिएको जनाएका छन् ।

देवानगन्जमा रहेका इलाका प्रहरी कार्यालय इटहरीका डीएसपी सुवास हमालले देवागन्जको अवस्था अहिले सामान्य रहेको जानकारी दिए । सुरक्षा व्यवस्था कडा बनाइएको उनको भनाइ छ । नेपाली सेनाले हवाई तथा पैदल गस्ती पनि गरिरहेको छ ।

झडपका क्रममा एकअर्कामाथि आक्रमण, तोडफोड र आगजनी भएको थियो । झडपमा रड, भाला, खुँडा, तरबार लगायतका घरेलु हतियार प्रयोग भएको प्रहरीले जनाएको छ ।

परिस्थिति नियन्त्रणमा लिन जाँदै गरेका सुरक्षाकर्मीलाई अवरोध गरिएपछि कठिन भएकाले नेपाल र सशस्त्र प्रहरी बाटैबाट फर्किन बाध्य भएका थिए । पछि नेपाली सेना परिचालन गरिएपछि अवस्था मत्थर भएको थियो ।

झडपका क्रममा देवानगन्जका केही घर तथा पसलमा आगजनी र तोडफोड भएको छ । डीएसपी हमालले कम्तीमा २० वटा घर तथा पसलमा क्षति पुगेको जानकारी दिए । यद्यपि, क्षतिको विस्तृत विवरण संकलन गर्न बाँकी छ ।

‘अहिलेसम्म क्षतिको विवरण संकलन गर्न सकिएको छैन । तर, २० वटाभन्दा बढी घर तथा पसलहरुमा ठूलो क्षति पुगेको छ,’ उनले भने । सुरक्षा अधिकारीहरुले मंगलबार दिउँसो देवानगन्ज र कप्तानगन्जको स्थलगत निरीक्षण गर्दै स्थानीय अगुवा तथा सरोकारवालासँग छलफल गर्दै अवस्था सामान्य बनाउन आग्रह गरेका थिए ।

तर, साँझ पुनः झडप हुन थालेपछि दुई पक्षबीचको झडपले देवानगन्ज बजार तनावग्रस्त र अशान्त बनेको थियो । त्यस क्रममा एकअर्काबीच आक्रमण, प्रत्याक्रमण तथा व्यक्तिका घर र पसलमा तोडफोड एवं आगजनी गरिएको प्रहरीले जनाएको छ ।