सामाजिक सद्भाव र शान्ति सुरक्षा कायम राख्न अपिल

Share this
718shares
मुलुकी खबर
मुलुकी खबर
clock२०८३ साउन १३, बुधबार १५:४३

इलाम । जिल्ला प्रशासन कार्यालय इलामले जिल्लामा सामाजिक सद्भाव, धार्मिक सहिष्णुता र शान्ति सुरक्षा कायम राख्न आम जिल्लावासीमा अपिल गरेको छ।

जिल्ला प्रशासन कार्यालय तथा शान्ति सुरक्षा तथा सामाजिक सद्भाव समिति इलामले सूचना जारी गर्दै धार्मिक, सामाजिक र सांस्कृतिक सद्भाव बिगार्ने एवं द्वन्द्व उक्साउने खालका सामग्री सामाजिक सञ्जालमा पोस्ट, सेयर नगर्न तथा कुनै पनि सञ्चार माध्यमबाट प्रसारण र प्रकाशन नगर्न/नगराउन आग्रह गरेको हो।

नेपाली जनताबीचको एकता, सद्भाव, धार्मिक सहिष्णुता र शान्ति सुरक्षालाई विखण्डन गर्न खोज्ने जुनसुकै दुष्प्रयासलाई निष्फल पार्न सबैको सहयोग आवश्यक रहेको प्रशासनले जनाएको छ।

नागरिकहरूबीच द्वेष सिर्जना गर्ने, उद्योग-व्यवसाय र नियमित क्रियाकलापमा असर पार्ने तथा शान्ति सुरक्षामा नकारात्मक असर पुर्‍याउने कुनै पनि गतिविधि नगर्न पनि आह्वान गरिएको छ।

कुनै पनि विषयमा मतभेद वा असमझदारी उत्पन्न भएमा आपसमा वार्ता, संवाद र कानुनसम्मत माध्यमबाट हल खोज्दै सामाजिक एकता जोगाउन जिल्ला प्रशासनले आग्रह गरेको छ।

धार्मिक स्वतन्त्रता, सहिष्णुता र सामाजिक मेलमिलाप बिगार्ने तथा द्वन्द्व उक्साउने क्रियाकलाप गरे वा गराएमा प्रचलित कानुनबमोजिम कारबाही हुने चेतावनी दिइएको छ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.