सुनसरी घटना छानबिन समितिमा २ सदस्य थपिए

काठमाडौं। सरकारले सुनसरीमा भएको घटनाका सम्बन्धमा छानबिन गर्न गठित समितिमा दुई सदस्य थप गरेको छ। गृह मन्त्रालयले बुधबार सचिवस्तरीय निर्णय गर्दै ब्यालिस्टिक र फरेन्सिक विज्ञका रूपमा प्रहरी उपरीक्षक मोहनसिंह धामी र प्रहरी निरीक्षक दिपेश अवस्थीलाई समितिमा मनोनयन गरेको हो। समितिलाई घटनाको प्रतिवेदन यथाशीघ्र बुझाउन निर्देशनसमेत दिइएको छ।

आइतबार राति सुनसरीको देवानगञ्जमा दुई समूहबीच भएको झडपको छानबिन गर्न गत सोमबार गृह मन्त्रालयका सहसचिव भुपेन्द्र थापाको संयोजकत्वमा ५ सदस्यीय समिति गठन गरिएको थियो।

Advertisement

मन्त्रालयले सुनसरीलगायतका अन्य जिल्लामा सोही प्रकृतिको घटना घट्न नदिनका लागि पूर्वतयारीसमेत सुरु गरेको छ। यसका लागि बाँके, कपिलवस्तु, धनुषा, सिरहा, सप्तरीलगायतका जिल्लामा शान्ति, सुव्यवस्था र आपसी सद्भाव कायम राख्न प्रमुख जिल्ला अधिकारीमार्फत आवश्यक समन्वय भइरहेको छ।

मन्त्रालयले ती क्षेत्रमा सुरक्षा अनुगमन र समन्वयलाई तीव्र पारेको छ। गृहमन्त्रीसहित सचिव र सुरक्षा निकायका प्रमुखहरूको उपस्थितिमा बुधबार जिल्लागत सुरक्षा अवस्थाबारे गम्भीर समीक्षासमेत गरिएको छ। वार्ताको माध्यमबाट सुनसरीको समस्या समाधान गर्न पहल भइरहेको र हाल देवानगञ्जलगायत अन्य संवेदनशील क्षेत्रको अवस्था सामान्य बन्दै गएको गृह मन्त्रालयले जनाएको छ।