‘दर्दनाक अवस्था नदोहोरियोस्’

काठमाडौं। चर्चित एवं लोकप्रिय लोक-रक साङ्गीतिक ब्यान्ड ‘नेपथ्य’ का मुख्य गायक अमृत गुरुङले तराई–मधेसमा भइरहेको पछिल्लो हिंसात्मक गतिविधिप्रति लक्षित गर्दै सरकार र राजनीतिक नेतृत्वलाई सचेत गराएका छन्।

सामाजिक सञ्जालमार्फत आफ्नो धारणा सार्वजनिक गर्दै गुरुङले तराई-मधेसको स्थितिलाई हलुका रूपमा नलिन सरकार र सरकारनिकट राजनीतिज्ञहरूलाई आग्रह गरेका हुन्।

Advertisement

‘प्रिय सरकार र सरकारसँग नजिकका राजनीतिज्ञहरू, तराई-मधेसलाई हलुका रूपमा नलिनुहोस्,’ उनले लेखेका छन्, ‘माओवादी द्वन्द्वकाल र मधेस आन्दोलनका बेला समस्यासँग जुधेका नेता, प्रहरी, सेना र प्रशासकहरूसँग छलफल गर्नुहोस्, उनीहरूको सल्लाह सुन्नुहोस्।’

विगतको इतिहास स्मरण गराउँदै गुरुङले २०-२५ वर्षअघिको घटनाक्रम अध्ययन गर्न र त्यसबाट पाठ सिक्न सुझाव दिएका छन्। त्यसताका आफूले भ्रमण गरेको मधेसको स्थिति अझै सम्झनामा रहेको उल्लेख गर्दै उनले पुनः त्यस्तै दर्दनाक अवस्था नदोहोरियोस् भनी कामना समेत गरेका छन्।