कप्तानगन्ज गोलीकाण्डका एक जना घाइतेलाई विराटनगरबाट लगियो काठमाडौं

मुलुकी खबर

२०८३ श्रावण १४, बिहीबार २०:१७

विराटनगर । सुनसरीको देवानगन्ज गाउँपालिका–३ कप्तानगन्जमा आइतबार राति सशस्त्र प्रहरीको गोली लागेर घाइते भएकामध्ये एक जनालाई थप उपचारका लागि काठमाडौं लगिएको छ ।

नेपाली सेनाको स्काई ट्रकमार्फत विराटनगरको नोबेल शिक्षण अस्पतालमा उपचाररत देवानगन्ज–३ का १८ वर्षीय अमित यादवलाई बिहीबार साँझ काठमाडौं लगिएको हो । यादवको बायाँ हात र कोखामा गोली लागेको थियो ।

शल्यक्रिया गरेर गोली निकालिसकिएको छ । अवस्था गम्भीर रहेका उनको नोबेल शिक्षण अस्पतालको भेन्टिलेटरमा उपचार भइरहेको थियो । अवस्था थप जटिल बन्दै गएपछि परिवारका सदस्यको सल्लाहमा थप उपचारका लागि काठमाडौं पठाइएको मोरङ प्रहरीका सूचना अधिकारी, डीएसपी मकेन्द्रकुमार मिश्रले बताए ।

चिकित्सकका अनुसार उनले बायाँ हात गुमाउने भएका छन् । यसअघि चै चिकित्सकले बायाँ हात जोगाउन नसकिने जानकारी परिवारलाई दिइसकेका थिए । परिवारका अनुसार अब यादवको उपचार ट्रमा सेन्टरमा हुनेछ । उनलाई काठमाडौं लैजानलाई स्वास्थ्यमन्त्री निशा मेहताले पहल गरेको बताइएको छ ।

विराटनगरकै विराट नर्सिङ होममा उपचाररत देवानगन्ज–३ का २१ वर्षीय रवीन्द्रकुमार मेहतालाई पनि काठमाडौं लैजाने तयारी थियो । तर, स्वास्थ्य अवस्था जटिल रहेकाले स्वास्थ्य उपकरण र चिकित्सकको निगरानीमा मात्रै लैजान सम्भव हुने देखिएपछि उनको तत्काल विराटमै उपचार भइरहेको छ । सबै कुराको चाँजोपाँजो मिलाएर मात्रै काठमाडौं पठाइने डीएसपी मिश्रले बताए ।

मेहताको बायाँ तिघ्रामा गोली लागेर नसामा गम्भीर चोट पुगेको चिकित्सकले बताएका छन् । नसाको शल्यक्रिया सम्पन्न भए पनि अवस्था गम्भीर रहेकाले भेन्टिलेटरमा उपचार भइरहेको छ । अवस्था गम्भीर बन्दै गएपछि मेहतालाई पनि थप उपचारका लागि काठमाडौं लैजान अस्पतालले सुझाव दिएको छ ।

दुई पक्षबीच भएको विवाद आइतबार राति हिंसात्मक झडपमा परिणत भएपछि स्थिति नियन्त्रणमा लिन सशस्त्र प्रहरीले चलाएको गोली लागेर १० जना युवा घाइते भएका थिए । घाइतेमध्ये देवानगन्ज–४ का २५ वर्षीय ओमप्रकाश मेहताको केहीबेरमा मृत्यु भयो ।

देवानगन्ज–३ का २२ वर्षीय जयप्रकाश मेहताको पनि उपचारका क्रममा बिहीबार दिउँसो न्युरो अस्पतालमा मृत्यु भएको छ । अन्य आठ जनाको विराटनगरका अस्पतालमा उपचार भइरहेकोमा एक जनालाई थप उपचारका लागि काठमाडौं लगिएको हो । अन्य सात जनाको विराटनगरकै न्युरो अस्पताल र विराट नर्सिङ होममा उपचार भइरहेको छ ।

तपाइको प्रतिक्रिया